Úkimet «Mańǵystaý» týrıstik aımaǵyn damytýdyń keshendi josparyn bekitti
ASTANA. KAZINFORM — Úkimet Memleket basshysy Qasym-Jomart Toqaevtyń Mańǵystaý oblysynda týrızmdi damytý jónindegi tapsyrmalaryn júzege asyrý aıasynda «Mańǵystaý» týrıstik aımaǵyn damytýdyń 2025–2029 jyldarǵa arnalǵan keshendi josparyn bekitti.
Tıisti qaýlyǵa Premer-mınıstr Oljas Bektenov qol qoıdy.
Qujatta 9 baǵyt boıynsha salalyq máselelerdi júıeli sheshý qarastyrylǵan. Onyń ishinde: ınfraqurylymdy damytý, logıstıka, tsıfrlandyrý, qaýipsizdikti qamtamasyz etý, kadr daıarlaý, ınvestıtsııalyq jobalardy ilgeriletý jáne basqa da baǵyttar bar. Jospardy júzege asyrý kezeńinde júzden astam is-shara uıymdastyrý kózdeledi.
Bolashaǵy zor 12 týrıstik nysannyń ishinde óńirdegi týrızmdi damytýdyń negizgi baǵyttarynyń biri Kendirli týrıstik aımaǵy bolyp belgilendi. Infraqurylymdyq máselelerdi sheshý, onyń ishinde ınjenerlik kommýnıkatsııalar júrgizý, týrıstik nysandardy elektr qýatymen, sýmen jabdyqtaý jáne kólik qoljetimdiligimen qamtamasyz etý boıynsha sharalar kesheni iske asyrylady. Kenderli aýylynda joldar men basqa da nysandardy jóndeýden bólek, áýejaı salynady. Bul rette ınvestorlar men eko-belsendilerdiń usynystary eskerildi.
Aqtaý qalasynda teńiz vokzaly men halyqaralyq deńgeıdegi stadıon salý josparlanyp otyr.
Sondaı-aq óńirde týrızmdi nasıhattaý úshin mádenı-sporttyq is-sharalar ótkizý kózdelgen.
Keshendi jospar týrıster tartýǵa qolaıly jaǵdaı jasaýǵa jáne týrıstik aımaqty odan ári damytýǵa qolaıly ınvestıtsııalyq ahýal qalyptastyrýǵa múmkindik beredi.
Sonymen qatar shaǵyn jáne orta bıznes ári qaraı damýǵa jańa serpin alyp otyr, bul úshin josparda «Kaspıı ÁKK» AQ jelisi arqyly týrızm salasyn jeńildetilgen nesıeleý baǵdarlamasyn iske qosý kózdelgen.
— Jospar júzege asyrylǵannan keıin 2029 jylǵa qaraı ishki týrıster sany 430 myńnan 520 myń adamǵa, al kelýshi týrıster sanyn 89 myńnan 143 myń adamǵa deıin artady dep kútiledi. Týrızm salasynda jumyspen qamtylǵandar sany 1,7 myń adamnan 2,7 myń adamǵa deıin, jeke ınvestıtsııa kólemi — 198,9 mlrd teńgege deıin, al óńir ekonomıkasyndaǵy týrızm úlesi — 2,2%-dan 3,6%-ǵa deıin ósedi, — delingen Úkimet habarlamasynda.
Osyǵan deıin búgin Úkimet ana men bala ólimin azaıtý sharalaryn talqylaıtyny anyqtaldy.