Úkimet mal sharýashylyǵyn tsıfrlandyrý máselesin talqylaıdy

ASTANA. KAZINFORM — Búgin saǵat 10:00–de Úkimet otyrysy ótedi. Onda Mınıstrler kabıneti mal sharýashylyǵyn, veterınarııalyq baqylaýdy jáne salany tsıfrlandyrýdy damytý máselesi talqyǵa salady.

Otyrys qorytyndysy boıynsha ótetin baspasóz konferentsııasyna:

• Aýyl sharýashylyǵy mınıstri Aıdarbek Saparov;
• Aýyl sharýashylyǵy vıtse-mınıstri Amanǵalı Berdalın;
• Aýyl sharýashylyǵy vıtse-mınıstri Azat Sultanov qatysady.

Olar BAQ ókilderi tarapynan týyndaǵan saýaldarǵa jan-jaqty jaýap beredi.

Úkimet otyrysynyń tikeleı taratylymy PrimeMinister.kz saıtynda, YouTube resmı arnasynda, Facebook áleýmettik jelisinde, sondaı-aq UKIMET Telegram-kanalynda júredi.
Baspasóz konferentsııasynyń tikeleı taratylymy YouTube resmı arnasynda jáne Facebook áleýmettik jelisinde kórsetiledi.

Aıta keteıik, 1 shildede ótken Úkimet otyrysyndasý sharýashylyǵyna qatysty máselelerdi egjeı-tegjeıli qaralǵan edi.

Sol kezde Sý resýrstary jáne ırrıgatsııa mınıstri Nurjan Nurjigitov sý ınfraqurylymyn jaqsartý maqsatynda bıyl Aqmola, Atyraý, Almaty, Ulytaý, Qaraǵandy, Qyzylorda, Mańǵystaý, Túrkistan, Batys Qazaqstan jáne Soltústik Qazaqstan oblystarynda toptyq sý qubyry nysandaryn salý jáne qaıta jańartý boıynsha 31 joba iske asyrylyp jatqanyn aıtty.

— Atalǵan 31 jobany tolyq iske asyrý nátıjesinde 2,6 myń shaqyrymnan astam sý qubyry salynady jáne bul 1,3 mln halyq turatyn 468 eldi mekenniń sýmen jabdyqtaý sapasyn jaqsartady. Sonymen qatar 53 eldi mekenge ortalyqtandyrylǵan aýyzsý júıesi alǵash ret qosylatyn bolady. Bul jobalardy iske asyrý úshin bıyl 101 mlrd teńge bólindi. Onyń ishinde 38,2 mlrd teńge — Ulttyq qordan, 53,9 mlrd teńge — arnaıy memlekettik qordan. 3,4 mlrd teńge respýblıkalyq bıýdjetten baǵyttalǵan, — dedi ol.

Al Ónerkásip jáne qurylys mınıstri Ersaıyn Naǵaspaev «Kommýnaldyq jáne energetıka sektorlardy jańǵyrtý» ulttyq jobasy aıasynda 45 qalada káriz tazartý qurylǵysy jańǵyrtylyp, 2800 shaqyrym sý burý jáne 5 myń shaqyrym sý qubyry jelisi jańartylatynyn aıtty. 

— Sondaı-aq ekologııalyq qaýipsizdikti basshylyqqa ala otyryp, káriz júıelerin jańartý jumystary eń aldymen eldi mekenderde júrgiziledi. Qazir tazartý nysandaryn jobalaý, salý jáne paıdalaný tásilderi qaıta qaralyp, jobalarǵa revızııa júrgizilip jatyr. Olardyń tıimdiligin arttyrý úshin tehnıkalyq operator ınstıtýty engizildi. Tehnıkalyq operator jobalardyń barlyq kezeńin qadaǵalap, qazaqstandyq ónimdi qoldaný talaptaryn eskeredi. Bul sharalar jobadaǵy qatelikterdi azaıtyp, shyǵynnyń artýy men merzimniń keshigýine jol bermeıdi, — dep tolyqtyrdy vedomstvo basshysy.

Úkimet otyrysyn qorytyndylaǵan Premer-Mınıstr ortalyq jáne jergilikti atqarýshy organdarǵa:

— «Samuryq-Qazyna» qory men Mańǵystaý oblysynyń ákimdigine 15 shildege deıin Kendirli zaýytyn iske qosý jumystaryn aıaqtap, Jańaózen qalasyna sý berýdi qamtamasyz etýdi;

— Qarjy jáne Ónerkásip mınıstrlikterine Ulytaý oblysynyń ákimdigimen birlesip, osy jyldyń 1 tamyzyna deıin Jezqazǵan qalasynyń sý tazartý qondyrǵysyna kúrdeli jóndeý jumystaryn júrgizý úshin qosymsha qarjylandyrý týraly sheshim qabyldaýdy;

— Ónerkásip jáne Sý resýrstary mınıstrlikteri men óńir ákimdikterine keshigip jatqan jobalardy tolyq aıaqtaý úshin túbegeıli sharalar qabyldaýdy; — Sýmen jabdyqtaý júıelerin damytýmen qatar únemdeý tehnologııalaryn engizý jáne sý resýrstaryn basqarýdy tsıfrlandyrý jumysyn kúsheıtýdi;

— Sýmen jabdyqtaý jelileriniń tozý deńgeıin odan ári tómendetýdi;

— Klımattyń ózgerýi, sýdy tutyný kóleminiń artýy jáne sý resýrstarynyń tapshylyǵy jaǵdaıynda zamanaýı tásilder men únemdeý tehnologııalaryn paıdalaný;

— Toptyq sý qubyrlaryn damytýdy eldi mekenderdi damytý josparlarymen úılestire otyryp júrgizýdi;

— Sý resýrstary mınıstrligi men Aqmola oblysynyń ákimdigine elorda mańyndaǵy aýyldardy bir ortalyqtan beriletin sýmen jabdyqtaýdy neǵurlym qysqa merzimde aıaqtaýdy;

— Óńir ákimdikterine jyl sońyna deıin aýyz sýmen qamtamasyz etý boıynsha qoldanystaǵy barlyq jobany iske qosýdy qamtamasyz etýdi;

— Qarjy mınıstrligine bekitilgen qarajatty jergilikti atqarýshy organdarǵa jedel tártippen aýdarýdy;

— Ónerkásip mınıstrligine jelilerdi jańǵyrtý kezinde qoldanystaǵy káriz tazartý qurylystarynyń ónimdiligin ulǵaıtýǵa jáne aǵyndy sýlardy tazartý sapasyn arttyrýǵa basa nazar aýdarýdy;

— Ónerkásip mınıstrligine ákimdiktermen birlesip, 1 qyrkúıekke qaraı energetıkalyq jáne kommýnaldyq sektorlardy jańǵyrtýdyń ulttyq jobasyn iske asyrý jónindegi ınvestıtsııalyq baǵdarlamalardy ázirleýdi;

— Sý resýrstary mınıstrligine osy jyldyń sońyna deıin toptyq sý qubyrlaryn salý jáne jańǵyrtý jobalaryn aıaqtaýdy;

— Qarjy mınıstrligimen birlesip, 2026 jyly toptyq sý qubyrlaryn biryńǵaı keshender retinde ákimdikterdiń balansyna berýdi qamtamasyz etýdi;

— Ulttyq ekonomıka mınıstrligine múddeli memlekettik organdarmen birlesip, múlikti respýblıkalyq menshikten kommýnaldyq menshikke berý máselelerin retteıtin normatıvtik quqyqtyq aktilerge ózgerister men tolyqtyrýlar engizýdi;

— Sý resýrstary mınıstrligine Ónerkásip mınıstrligimen birlesip, sý obektileriniń tsıfrlyq pasporttary men ıntellektýaldyq sý kadastryn engizý máselesin pysyqtaýdy;

— Ulttyq ekonomıka mınıstrligine Qarjy mınıstrligimen jáne «Báıterek» holdıngimen birlesip, Ulttyq joba aıasynda kózdelgen ınvestıtsııalyq jobalardy qarjylandyrýdy qamtamasyz etýdi tapsyrdy.

— Halyqty sapaly aýyz sýmen qamtamasyz etý — óte mańyzdy mindetterdiń biri. Bul másele Memleket basshysynyń tikeleı baqylaýynda. Qajetti qarajat Respýblıkalyq bıýdjette kózdelgen. Sonymen qatar zańsyz shyǵarylǵan aktıvterdi elge qaıtarý jónindegi Prezıdent tapsyrmasy aıasynda sýmen jabdyqtaý boıynsha 230-ǵa tarta jobany iske asyrý úshin arnaýly memlekettik qordan qosymsha 160 mıllıard teńgeden astam qarjy bólindi. Turǵyndardyń ómir sapasy taza aýyz sýǵa tikeleı táýeldi. Sondyqtan eldi mekenderdi sýmen qamtamasyz etý — Úkimettiń basym mindetteriniń biri, — dedi Úkimet basshysy.