Úkimet qurylys sapasyna baqylaýdy kúsheıtedi: merdigerlerdiń jaýapkershiligi artady
ASTANA. KAZINFORM -Úkimette QR Premer-mınıstriniń birinshi orynbasary Nurlybek Nálibaevtyń tóraǵalyǵymen ortalyq memlekettik organdar ókilderiniń, oblystar men respýblıkalyq mańyzy bar qalalar ákimderiniń, sondaı-aq «Samruk-Kazyna Construction» AQ basshylyǵynyń qatysýymen turǵyn úı jáne áleýmettik ınfraqurylym nysandarynyń qurylys sapasy máseleleri boıynsha keńes ótti, dep habarlaıdy Úkimettiń baspasóz qyzmeti.
Kezdesý barysynda qurylys jobalaryn júzege asyrý kezinde baqylaýdy kúsheıtý sharalary qaraldy.
Keńes Memleket basshysynyń qurylys sapasyn arttyrý, nysandardyń qaýipsizdigin qamtamasyz etý jáne bıýdjet qarajatynyń tıimdi paıdalanylýyna baqylaýdy kúsheıtý jónindegi tapsyrmalaryn júzege asyrý aıasynda ótkizildi.
Ónerkásip jáne qurylys mınıstriniń 2024–2025 jyldary paıdalanýǵa berilgen nysandarǵa júrgizilgen monıtorıng nátıjeleri týraly baıandamasy tyńdaldy.
Vedomstvonyń málimetinshe, monıtorıng 1 032 nysandy qamtydy. Onyń ishinde 725 áleýmettik ınfraqurylym nysany, 230 turǵyn úı qurylysy jáne abattandyrý obektisi, sondaı-aq 77 ınjenerlik, kóliktik, ákimshilik jáne ózge de ınfraqurylym nysandary bar.
Monıtorıng barysynda óńirlerde qurylys-montajdaý jumystarynyń sapasyna jáne qurylys baqylaýyn uıymdastyrýǵa baılanysty birqatar aqaý men kemshilik anyqtaldy. «Samruk-Kazyna Construction» AQ operator bolyp sanalatyn «Keleshek mektepteri» ulttyq jobasy aıasynda salynǵan nysandarǵa erekshe nazar aýdaryldy.
Premer-mınıstrdiń birinshi orynbasary qurylys baqylaýy men aqaýlardy joıýda kózboıaýshylyqqa jol berilmeıtinin atap ótti. Qurylys sapasy jobalardy júzege asyrýdyń barlyq kezeńderinde jobalaý men qurylys-montajdaý jumystarynan bastap obektilerdi qabyldaý, tehnıkalyq jáne avtorlyq qadaǵalaý, sondaı-aq kepildik mindettemelerin oryndaýǵa deıin qamtamasyz etilýi tıis.
Turǵyn úı, áleýmettik nysandar, ınjenerlik-kommýnaldyq ınfraqurylym, joldar, abattandyrý obektileri, aýla aýmaqtary, syrtqy jaryqtandyrý, temirjol vokzaldary men avtovokzaldardyń qurylysyna baqylaýdy kúsheıtý qajettigi atap ótildi. Anyqtalǵan kemshilikter merdigerlik uıymdardyń qarajaty esebinen, kepildik mindettemeleri sheńberinde, qosymsha bıýdjet qarajatyn tartpaı joıylýǵa tıis ekeni basa aıtyldy.
Osyǵan baılanysty qurylys baqylaýyn kúsheıtý jáne tapsyrys berýshilerdiń, merdigerlik uıymdardyń, tehnıkalyq jáne avtorlyq qadaǵalaýdyń jaýapkershiligin arttyrý sharalary talqylandy.
Keńes barysynda muqtaj azamattar arasynda turǵyn úıdi bólý, sondaı-aq jol salasyn bıtýmmen qamtamasyz etý máselelerine jeke nazar aýdaryldy. Ákimdikterdiń, ýákiletti organdar men jaýapty uıymdardyń turǵyn úıdi ýaqtyly usyný, bıtýmǵa qajettilikti josparlaý jáne jol-qurylys maýsymynyń turaqty ótýin qamtamasyz etý boıynsha úılestirilgen jumysy qajettigi atap ótildi.
-Keńes qorytyndysy boıynsha Premer-mınıstrdiń birinshi orynbasary qurylys protsesiniń barlyq qatysýshylarynyń derbes jaýapkershiligin arttyrý, formaldy baqylaýdan buzýshylyqtardyń aldyn alýǵa jáne jobalardy júzege asyrýdyń barlyq kezeńderinde sapany qamtamasyz etýge baǵyttalǵan júıeli jumysqa kóshý qajettigine nazar aýdara otyryp, birqatar tapsyrma berdi,-delingen habarlamada.
Osyǵan deıin habaorlaǵanymyzdaı, elde qurylys jumystarynyń kólemi 13,4%-ǵa ósti.
https://kaz.inform.kz/news/kazakstanda-kurilis-zhumistarinin-kolem-134-ga-ost-6c929e09
