Úkimet quramy tolyqtaı jasaqtaldy: qaı salalarǵa jańa mınıstrler keldi
ASTANA. KAZINFORM — Premer-mınıstr orynbasarlary men mınıstrler tolyqtaı taǵaıyndalyp, Úkimettiń jańa quramy belgili boldy. Mınıstrlerdiń basym bóligi qyzmetinde qaldy. Degenmen, keı salalardyń mınıstrleri aýysty.
Eske salaıyq, dúısenbi, 31 tamyz kúni Quryltaıdyń jalpy otyrysynda Memleket basshysy Qasym-Jomart Toqaev Úkimet basshysy laýazymyna Oljas Bektenovtiń kandıdatýrasyn usynǵan edi.
Sol kúni Prezıdent tıisti jarlyqqa qol qoıyp, Bektenov Premer-mınıstr laýazymyna qaıta taǵaıyndaldy.
Premer-mınıstrdiń orynbasarlary kimder
Búgin Úkimet basshysynyń orynbasary qyzmetin kimder atqaratyny jarııalandy.
Qazaqstan Respýblıkasy Premer-mınıstriniń birinshi orynbasary laýazymyna Nurlybek Nálibaev taǵaıyndaldy.
Tıisti Jarlyqqa Prezıdent Qasym-Jomart Toqaev qol qoıdy.
— Nurlybek Mashbekuly Nálibaev Qazaqstan Respýblıkasy Premer-mınıstriniń birinshi orynbasary laýazymyna taǵaıyndalsyn, — delingen qujatta.
Aıta keteıik, ol atalǵan qyzmetti bıylǵy mamyr aıynan bastap atqarǵan edi. Endi osy laýazymyn jalǵastyrmaq.
Sonymen qatar, Ǵalymjan Qoıshybaev ta qyzmetinde qaldy. Ol Premer-mınıstrdiń orynbasary — Úkimet Apparatynyń basshysy bolyp taǵaıyndaldy.
— Memleket basshysynyń Jarlyǵymen Ǵalymjan Telmanuly Qoıshybaev Qazaqstan Respýblıkasy Premer-mınıstriniń orynbasary — Úkimet Apparatynyń basshysy laýazymyna taǵaıyndaldy, — dep habarlady Aqordanyń baspasóz qyzmeti.
Al Qanat Bozymbaev Premer-mınıstrdiń orynbasary bolyp qala beredi.
— Memleket basshysynyń Jarlyǵymen Qanat Aldabergenuly Bozymbaev Qazaqstan Respýblıkasy Premer-Mınıstriniń orynbasary laýazymyna taǵaıyndaldy, — dep aqparat taratty Aqordanyń baspasóz qyzmeti.
Serik Jumanǵarın de burynǵy jumysyn jalǵastyrady. Prezıdent Jarlyǵymen ol Premer-mınıstrdiń orynbasary — Ulttyq ekonomıka mınıstri qyzmetine qaıta taǵaıyndaldy.
Qaı salalarǵa jańa mınıstrler taǵaıyndaldy
QR Syrtqy ister mınıstri qyzmetin endi Muhtar Tileýberdi atqarady.
Munyń aldynda ol 2023 jyldan bastap Qazaqstan Respýblıkasynyń Aýstrııa Respýblıkasyndaǵy Tótenshe jáne Ókiletti Elshisi, Qazaqstan Respýblıkasynyń Vena qalasyndaǵy halyqaralyq uıymdar janyndaǵy Turaqty ókili bolǵan edi.
Al Murat Muhanov Tótenshe jaǵdaılar mınıstri bolyp taǵaıyndaldy.
Ol 2024 jyldyń sáýir aıynan bastap QR TJM Mańǵystaý oblysy Tótenshe jaǵdaılar departamentiniń bastyǵy qyzmetin atqarǵan bolatyn.
Ekologııa jáne tabıǵı resýrstar salasyna da jańa mınıstr keldi. Bul týraly Aqordanyń baspasóz qyzmeti málim etti.
— Memleket basshysynyń Jarlyǵymen Álibek Sakenuly Qýantyrov Qazaqstan Respýblıkasynyń Ekologııa jáne tabıǵı resýrstar mınıstri bolyp taǵaıyndaldy, ol burynǵy atqarǵan laýazymynan bosatyldy, — delingen habarlamada.
Sonymen qatar, Mádenıet jáne aqparat salasyna jańa mınıstr taǵaıyndaldy. Endi bul laýazymdy Arman Qyryqbaev atqarady.
Ol buǵan deıin QR Prezıdentiniń ishki saıasat máseleleri jáne kommýnıkatsııalar jónindegi kómekshisi bolǵan edi.
Qaı salalardyń mınıstrleri jumysyn jalǵastyrady
2025 jyldyń maýsym aıynan bastap Qorǵanys mınıstri bolǵan Dáýren Qosanov sol laýazymyna qaıta taǵaıyndaldy.
Memleket basshysynyń jarlyǵymen Erjan Sádenov te ornynda qaldy.
Ol — 2023 jyldan beri Іshki ister mınıstri.
Al Jaslan Mádıev Jasandy ıntellekt jáne tsıfrlyq damý mınıstri laýazymyna qaıta taǵaıyndalyp, osy baǵyttaǵy jumysyn jalǵastyrady.
Qarjy sektorynyń basshysy da aýysqan joq. Mádı Takıev Qarjy mınıstrligin odan ári basqara beredi.
Kólik salasynda da aýys-túıis bolǵan joq. Prezıdent jarlyǵymen Nurlan Saýranbaev Kólik mınıstri qyzmetinde qaldy.
Al Erlan Sársembaev Ádilet mınıstri bolyp qaıta taǵaıyndaldy.
Tıisti Jarlyqqa Qasym-Jomart Toqaev qol qoıdy.
— Erlan Jaqsylyquly Sársembaev Qazaqstan Respýblıkasynyń Ádilet mınıstri laýazymyna taǵaıyndalsyn, — delingen qujatta.
Sonymen birge, Erlan Aqkenjenov Energetıka mınıstri bolyp qaıta taǵaıyndaldy.
Ol bul laýazymdy 2025 jyldyń naýryz aıynan beri atqaryp keledi.
Ersaıyn Naǵaspaev ta jumysyn jalǵastyrady. Ol Ónerkásip jáne qurylys mınıstri qyzmetinde qaldy.
Byltyrǵy qyrkúıekten Oqý-aǵartý mınıstri bolǵan Juldyz Súleımenova Prezıdent Jarlyǵymen salany odan ári basqara beredi.
Saýda jáne ıntegratsııa mınıstri de aýysqan joq. Bul laýazymǵa Arman Shaqqalıev qaıta taǵaıyndaldy.
Al Nurjan Nurjigitov Sý resýrstary jáne ırrıgatsııa mınıstri retindegi qyzmetin jalǵastyrady. Sala tizginin ol úsh jyl buryn qolǵa alǵan edi.
Qasym-Jomart Toqaev Aqmaral Álnazarovaǵa Densaýlyq saqtaý salasyn odan ári ilgeriletýge múmkindik berdi.
— Memleket basshysynyń Jarlyǵymen Aqmaral Sháripbaıqyzy Álnazarova Qazaqstan Respýblıkasynyń Densaýlyq saqtaý mınıstri laýazymyna taǵaıyndaldy, — dep habarlady Aqordanyń baspasóz qyzmeti.
Sondaı-aq, Aıdarbek Saparov Aýyl sharýashylyǵy mınıstri qyzmetinde qaldy.
Ol sala mınıstri retinde qyzmetine 2023 jyldyń qyrkúıeginde kirisken edi.
2026 jylǵy 27 qańtardan bastap QR Eńbek jáne halyqty áleýmettik qorǵaý mınıstri qyzmetin atqarǵan Asqarbek Ertaev ta jumysyn jalǵastyrady.
Erbol Myrzabosynov ta ornynda qaldy. Ol Týrızm jáne sport mınıstri laýazymyna qaıta taǵaıyndaldy.
Al Saıasat Nurbek Ǵylym jáne joǵary bilim mınıstri retinde odan ári jumys isteıdi.
Aıta keteıik, buǵan deıin Aıda Balaeva jańa qyzmetke taǵaıyndalǵanyn jazǵanbyz.
Al Rınat Muhametqalı QR Prezıdenti Ákimshiliginiń Jalpy bóliminiń meńgerýshisi laýazymyna taǵaıyndaldy.
