Úkimet quny 30 mlrd dollar bolatyn 73 ınvestıtsııalyq jobany qolǵa aldy
ASTANA. KAZINFORM – Elimizde ınvestıtsııalyq jobalardy súıemeldeý Ulttyq tsıfrlyq ınvestıtsııalyq platforma arqyly júzege asyrylady. Tolyǵyraq QR Premer-Mınıstrdiń birinshi orynbasary Roman Sklıar aıtyp berdi.
«Invest shtabtyń jumysy erekshe baqylaýda. Jalpy somasy shamamen 30 mlrd dollar bolatyn 73 ınvestıtsııalyq jobalar qaraldy. Jobalar sanyn kóbeıtý jáne olardy súıemeldeý úshin memlekettik organdar men ákimdikterdi úılestirý boıynsha tıisti jumys kúsheıtiledi. Ol úshin «ınvestıtsııaǵa tapsyrys» mehanızmi ázirlendi, onda ákimdikter óńirlerdiń ereksheligi men artyqshylyqtaryn eskere otyryp bastama jasaıdy», - dedi Roman Sklıar Úkimet otyrysynda.
Onyń aıtýynsha, ınvestıtsııalyq jobalardy súıemeldeý Ulttyq tsıfrlyq ınvestıtsııalyq platformada júrgiziledi.
«Búginde platformada 746 joba tirkeldi, ınvestıtsııalardyń jalpy somasy shamamen 68 mlrd AQSh dollaryn quraıdy», - deıdi ol.
Odan ári vıtse-premer otandyq avtokólik salasyn damytýǵa qatysty josparmen bólisti.
«Memleket basshysy Qazaqstan halqyna Joldaýynda ekonomıkanyń naqty sektoryn damytý boıynsha ózekti máselelerdiń aıasyn aıqyndap berdi. Ónerkásip salasyn odan ári qalyptastyrý úshin metallýrgııa, munaı óńdeý jáne munaı-gaz hımııasy, mashına jasaý, hımııa salalaryndaǵy 17 serpindi jobanyń tizbesi bekitildi. Investıtsııalyq shtab sheńberinde monıtorıngi júzege asyrylatyn árbir jobany iske asyrý boıynsha egjeı-tegjeıli josparlar bekitildi», - deıdi ol.
Onyń aıtýynsha, avtomobıl jasaý qarqyndy damyp keledi. Ótken jyldyń qorytyndysy boıynsha óndiris kólemi 30 paıyzǵa artqan.
«160 myń birlikti quraıtyn eki iri jobany paıdalanýǵa berý josparlanýda. Sondaı-aq 2025 jyldyń sońyna deıin avtokólik komponentterin óndirý boıynsha 10 jobany iske asyrý josparlanýda», - deıdi R. Sklıar.
