Úkimet qýańshylyq qaýpine qarsy daıyndyqty kúsheıtedi
ASTANA. KAZINFORM – Bul týraly Oljas Bektenov kóktemgi egis jumystaryn aıaqtaý jáne AÓK-ti damytý máseleleri jónindegi keńeste aıtty.
Jıyn qorytyndysynda Premer-mınıstr Memleket basshysynyń azyq-túlik qaýipsizdigin nyǵaıtý jáne AÓK-ti joǵary tehnologııalyq eksporttyq salaǵa aınaldyrý jónindegi alǵa qoıǵan mindetin júzege asyrý úshin barlyq qajetti jaǵdaılar jasalyp jatqanyn atap ótti.
— Ósimdik sharýashylyǵy salasy turaqty ósim kórsetip otyr, al bizdiń mindetimiz — osy qarqyndy saqtap, odan ári arttyra túsý. Aýyl sharýashylyǵy, Sý resýrstary jáne Ekologııa mınıstrlikteri óńir ákimdikterimen birlesip, ásirese qýańshylyq qaýpi bar aımaqtarda egistikterdi sýmen qamtamasyz etý jaǵdaıyn turaqty baqylaýda ustaýy tıis. Qajet bolǵan jaǵdaıda aýyl sharýashylyǵy taýar óndirýshilerin qoldaý jáne ónimdi saqtap qalý úshin jedel sharalar qabyldaý kerek. Barlyq agrotehnologııalyq talaptar belgilengen ǵylymı normalarǵa qatań sáıkes oryndalýy tıis. Mıneraldy tyńaıtqyshtardy ýaqtyly engizýdi qamtamasyz etý qajet. Ósimdikterdi qorǵaý sharalaryn júrgizýge erekshe nazar aýdarý kerek, — dep atap ótti Oljas Bektenov.
Aýyl sharýashylyǵynyń negizgi baǵyttarynyń biri retinde mal sharýashylyǵy salasynyń zor áleýeti bar ekeni atap ótildi.
Onyń júıeli damýy úshin bıyl 5 jylǵa arnalǵan, búkil óndiristik tizbek boıynsha jeńildetilgen qarjylandyrýdy kózdeıtin Keshendi jospar bekitildi.
Mal sharýashylyǵynyń barlyq kishi salalary men sanattaryna 220 mlrd teńge baǵyttalatyn bolady. Іri qara jáne usaq maldyń asyl tuqymdy basyn satyp alýǵa arnalǵan «Igilik» jáne «Bereke» jańa kredıttik ónimderi iske qosyldy, olardyń bekitilgen mólsherlemesi 6%-dan aspaıdy.
Mal aıdaý sharýashylyǵyn yntalandyrý maqsatynda jaıylym ınfraqurylymyn damytýǵa baǵyttalǵan «Jaılaý» biryńǵaı kredıttik ónimi iske qosylýda. Aınalym qarajatyn tolyqtyrýǵa arnalǵan 5% mólsherlememen jeńildetilgen kredıtteý baǵdarlamasy qoljetimdi.
Osy baǵytta ákimdikterge jumysty kúsheıtip, jer resýrstary aıtarlyqtaı iri sharýashylyqtardyń múmkindikterin tolyq kólemde paıdalaný tapsyryldy.
Aıta ketelik Bektenov jumys oryndaryn ashpaǵan jer ıelerinen jer qaıtarylatynyn eskertken edi.
