Úkimet QTJ-ǵa tıesili temirjol magıstralderin derbes ulttyq kompanııaǵa berýden bas tartty
ASTANA. KAZINFORM – «QTJ» UK» AQ-dan magıstraldyq temirjol jelisin shyǵarý orynsyz. Premer-mınıstr Oljas Bektenovtiń Májilis depýtattarynyń saýalyna joldaǵan jaýabynda osyndaı ustanym aıtylǵan.
Máseleniń mánisi
«Qazaqstan temir joly» ulttyq kompanııasy» aktsıonerlik qoǵamy ІRO-ǵa shyǵarylatyny týraly habar taraǵannan beri Kólik mınıstrliginiń bul bastamasyn synaýshylar kóp. Sonyń bári «QTJ»-ny ІRO-ǵa shyǵarý temirjol salasyndaǵy monopolııany jekeshelendirýdiń quıtyrqy amaly degenge saıady.
Saýal joldaǵan depýtattar temirjol magıstralderi strategııalyq nysan ekenin, «QTJ-ny» qazirgi quramymen ІRO-ǵa shyǵarý strategııalyq aktıvti jekeshelendirip berý bolatynyn aıtyp dabyl qaqqan.
Depýtattardyń ýáji
- Magıstraldyq temirjol jelisi, strategııalyq memlekettik aktıv bolyp tabylady, al ony basqarý, memleket, bıznes jáne qoǵam múddeleriniń teńgerimin qamtamasyz etýi qajet. Aktsııalarynyń 100 paıyzy memlekette qalýy tıis jáne satylýǵa jatpaıtyn ulttyq ınfraqurylym operatoryn bólek zańdy tulǵaǵa bólmeı, «QTJ» AQ IPO-ǵa shyǵarý, múddeler qaqtyǵysyn týdyrady. Óıtkeni jeke ınvestorlar, Qazaqstannyń temirjol ınfraqurylymyn uzaq merzimdi túrde damytýǵa emes, paıdasyn barynsha arttyrýǵa múddeli bolady. «QTJ» AQ quramynan bólek zańdy tulǵaǵa bólý jolymen, magıstraldyq temirjol jelilerin alyp tastaı otyryp, QR Úkimetiniń № 908 Qaýlysyna ózgertý engizilsin, - delingen saýalda.
Úkimettiń ustanymy
Úkimet «QTJ» ІRO-ǵa shyǵarylǵan kúnniń ózinde negizgi baqylaý tetigi «Samuryq Qazynanyń» qolynda bolatynyna sendirip otyr.
- «QTJ» UK» AQ-nyń IPO-ǵa shyǵýy boıynsha jumys júrgizilip jatyr, onyń sheńberinde basqa ulttyq kompanııalardyń IPO-syna uqsas 25 %-dan aspaıtyn kólemde aktsııalardy satý boljanady. Osylaısha, ulttyq operator aktsııalarynyń baqylaý paketi «SamuryqQazyna» UÁQ» AQ-da saqtalady. Osyǵan baılanysty «QTJ» UK» AQ-dan magıstraldyq temirjol jelisin shyǵarý orynsyz bolyp kórinedi, - dep jazady Oljas Bektenov.
QTJ-nyń IPO-ǵa shyǵýǵa daıyndalyp jatqanyn buǵan deıin de jazǵan edik.