Úkimet Qostanaı oblysynda elektr jelilerin qalpyna keltirýge 1,3 mlrd teńge bóledi
ASTANA. KAZINFORM – Premer-Mınıstr Oljas Bektenov Úkimettiń tótenshe rezervinen Qostanaı oblysynda aýqymdy sý tasqyny saldarynan zaqymdalǵan elektr berý jelilerin qalpyna keltirýge 1,3 mlrd teńgeden astam qarajat bólý týraly qaýlyǵa qol qoıdy.
Jóndeý jumystary Arqalyq qalasynda, Amangeldi jáne Jangeldi aýdandarynda júrgiziledi, bul jergilikti turǵyndardy turaqty elektrmen qamtamasyz etýge múmkindik beredi.
Bıyl 27 naýryzda ózender men sý aıdyndaryndaǵy sý deńgeıiniń birden kóterilýine baılanysty Qostanaı oblysynyń ońtústik aýdandary sý astynda qaldy. Sonyń saldarynan áýedegi elektr jelileri men transformatorlyq qosalqy stansalardyń tirekteri astyndaǵy topyraq shaıylyp ketti. Bul olardyń zaqymdalýyna jáne 37 eldi mekenniń turǵyndaryn elektrmen jabdyqtaýdy shekteýge ákeldi. Tehnıkalyq tekseris qorytyndysy boıynsha 989 zaqymdalǵan tirek anyqtaldy.
Búgingi tańda barlyq iri eldi mekenderde elektrmen jabdyqtaý ýaqytsha shema boıynsha qalpyna keltirildi. Jóndeý brıgadalary sý tasqynynyń saldaryn múmkindiginshe tez joıý úshin jumysty jalǵastyrýda.
Esterińizge sala keteıik, 21 maýsymda Parlament palatalarynyń birlesken otyrysynda Premer-Mınıstr Oljas Bektenov júrgizilip jatqan jumys barysyna túsinikteme bergen bolatyn.
Barlyǵy 12 myń turǵyn úı (JTQ) jáne 26 myń saıajaı ýchaskeleri sý astynda qaldy. Zaqym kelgen 17 982 úıge tekserý jasalyp, 15 685-in baǵalaý jumysy aıaqtaldy. Olardyń jartysyna jýyǵy jóndeýdi jáne qalpyna keltirýdi qajet etedi. Osy maqsattarǵa 38,6 mlrd teńge bólinip, 5 823 otbasy ótemaqy aldy.
8 myńnan astam úı apatty dep tanyldy. Olar boıynsha azamattardyń talap-tilegine baılanysty zalaldy óteýdiń 2 nusqasy qarastyrylǵan: qaıtalama naryqta páter nemese úı satyp alý; úı salyp berý.
3 155 otbasy jańa baspana aldy. Óńirlerde 2 049 úıdiń qurylysy belsendi júrgizilip jatyr. Jalpy turǵyn úıdi qalpyna keltirýge jáne salýǵa 251 mlrd teńge baǵyttaldy. Sonymen qatar ınjenerlik, áleýmettik ınfraqurylymǵa jáne joldarǵa zııan keldi. Atap aıtqanda, 2,3 myńnan astam energııamen jabdyqtaý tirekteri qırap, 54 km jeli úzildi. 40%-dan astamy búginde qalpyna keltirildi, jaz aılarynda jumys qarqyny artady.
