Úkimet qosylǵan qun salyǵyn tóleýshilerge apta saıyn avtomatty habarlama jiberip otyrmaq

- Búgingi tańda QQS-ty avtomatty túrde esepteý jáne QQS-tyń balanstyq somasyn esepke alý boıynsha pılottyq jobany ázirleý jumysy júrgizilip jatyr. Joba salyq tóleýshini salyq kezeńindegi QQS boıynsha boljamdy salyqtyq mindettemeleri týraly aldyn ala habardar etý maqsatynda ázirlendi jáne «e-Tamga» arnaıy aqparattyq servısin paıdalana otyryp, QQS-ny avtomatty túrde esepteý jáne QQS-nyń balanstyq somasyn esepke alý boıynsha pılottyq jobany júrgizý tártibin aıqyndaıdy, - dep jazylǵan jaýapta.
Mundaǵy «e-Tamga» aqparat servısiniń 2025 jyly iske qosylatyny byltyrdan beri aıtylyp júr. Elektrondy shot faktýralardyń aqparat júıesindegi málimetter, taýardyń deklaratsııasy, bıýdjetke tólengen janama salyqtar men alymdar týraly derekter osy «e-Tamga» servısine Memlekettik kirister komıtetiniń aqparat júıeleri arqyly avtomatty túrde túsip otyrady.
Servıs ózine túsken málimetter negizinde memleketke tólenýge tıis QQS teńgerimin avtomatty túrde eseptep otyrady. Jańa málimetter túsken saıyn QQS teńgeriminiń mólsheri de tolyqtyrylyp otyrady.
Ol esepterdi «e-Tamga» operatory ár aptanyń basynda QQS tóleýshiniń uıaly telefon nómirine jańartyp joldap otyrady. QQS tóleýshiler «e-Tamga» operatorymen qoldaný kelisimshartyna otyrýy kerek. «e-Tamga» dep aty aıtyp turǵandaı, bul servısti qosylǵan qun salyǵynan túsken aqshany tsıfrlandyratyn qural dep túsinýge bolady. Osy arqyly memleket qosylǵan qun salyǵynyń árbir qozǵalysyn tsıfrly izi arqyly baqylap otyrmaq.
Sondaı-aq, Oljas Bektenov QQS mólsherlemesin 16% etip, ondaı salyq alynatyn aınalymnyń mólsherin 15 mln teńge etýden túsetin qosymsha kiris qandaı maqsattarǵa jumsalatynyn jazǵan.
- Jumys barysynda QQS mólsherlemesin arttyrýdyń ártúrli nusqalary qaralǵanyn atap ótken jón. Talqylaý qorytyndysy boıynsha 16% bazalyq mólsherleme usynylady. Ony arttyrý jáne saralaý bıýdjettiń turaqsyz munaı kiristerine táýeldiligin azaıtýǵa, Ulttyq qordyń jınaqtaý fýnktsııasyn kúsheıtýge jáne 4 basym memlekettik jobalardyń qarjylandyrylýyn qamtamasyz etýge múmkindik beredi, - deıdi Premer-mınıstr.
Buǵan deıin «Atameken» ulttyq kásipkerler palatasynyń tóralqa tóraǵasy Raıymbek Batalov qosylǵan qun salyǵyn kóterýden túsetin kiristiń Úkimet kútkendeı kólemde bolmaýy múmkin ekenin aıtqan edi.