Úkimet qosylǵan qun salyǵyn reformalaýǵa qatysty usynys engizgen joq – Májilis depýtaty
ASTANA. KAZINFORM – Úkimet qosylǵan qun salyǵyn reformalaýǵa qatysty Májiliske áli usynys engizgen joq. Bul týraly Májilis depýtaty Tatıana Saveleva aıtty.
«Qosylǵan qun salyǵy mólsherlemesin arttyrý máselesin jańa Úkimet kún tártibinen alyp tastady. Al bul salyqtyń ózin pysyqtaý onda bar barlyq jeńildikterdi talqylaýmen qatar júrýi tıis de oılaımyn. Onsyz talqylaý durys emes sııaqty. Sondyqtan da Úkimettiń qosylǵan qun salyǵyna qatysty ne usynatyndyǵyn qaraıtyn bolamyz. Sonymen qatar salyqtyq jeńildikterdi qaıta qaraý baǵytyndaǵy jumys aıasynda qazir qoldanystaǵy jeńildikterdi mindetti túrde qaraımyz», - dedi depýtat agenttik tilshisine bergen suhbatynda.
Osy oraıda depýtat Úkimet tarapynan QQS-qa qatysty usynys Májiliske áli túspegendigin basa aıtty.
«Ázirshe, kóterýge (QQS-ti kóterý) qatysty sóz bolyp otyrǵan joq. Odan bas tartylǵan edi», - dedi Tatıana Saveleva.
13 aqpanda ótken Úkimet otyrysynda Premer-Mınıstr Oljas Bektenov qosylǵan qun salyǵynyń óspeıtinin málim etken edi.
«Qosylǵan qun salyǵynyń stavkasy kóterilmeıdi. Ulttyq ekonomıka mınıstrligi men Qarjy mınıstrligi respýblıkalyq bıýdjettiń shyǵys jáne kiris bóligin sapaly josparlaýdy qamtamasyz etýi kerek», - dedi Oljas Bektenov.
