Úkimet qosylǵan qun salyǵyn 20 paıyz kóterý degen sheshimge áli naqty kelgen joq – Jumanǵarın

ASTANA. KAZINFORM – Premer-mınıstrdiń orynbasary – Ulttyq ekonomıka mınıstri Serik Jumanǵarın Úkimettiń keńeıtilgen otyrysynan keıin ótken baspasóz máslıhatynda memlekettiń QQS mólsherlemesin kóterý josparyna túsinikteme berdi.

- Qazir BAQ-ta qosylǵan qun salyǵynyń mólsherlemesin birden 20 paıyzǵa kóteredi eken degen aqparat tarap jatyr. 20 paıyz degen – álemde eń kóp taralǵan mólsherleme. Biz Úkimet retinde ázirge naqty mólsherlemeni áli naqty aıqyndaǵan joqpyz. Shynymdy aıtyp otyrmyn. Nege? Óıtkeni biz bıznesmendermen, qaýymdastyqtarmen túrli konsýltatsııalar júrgizip jatqanymyzǵa bir aı bolyp qaldy. «Atameken» ulttyq kásipkerler palatasynyń alańdarynda kezdesýler ótkizip júrmiz. Bizde birqatar konsýltanttar, jetekshi ekonomıster, salyq mamandary bar. Olar da túrli esepter, stress-synaqtar júrgizip jatyr, - dedi vıtse-premer.

Degenmen, Úkimet bul baǵytta birneshe stsenarıı daıyndap otyrǵan kórinedi.

- Biz Ulttyq banktiń makroekonomıkalyq modeliniń negizinde birneshe esepteýler jasadyq. Biraq úkimet túpkilikti sheshim shyǵardy dep aıtýǵa erte. Biz QQS-ti kóterý kerek dep otyrmyz. Reforma kerek. Jalpy Memleket basshysy búgin bul turǵyda bizdi qoldady. Biz burynǵy sharttarmen ómir súre almaımyz. Óıtkeni qazir zańnamanyń «arqasynda» kásipkerlerdiń kóbine salyq mólsherin qysqartýǵa múmkindik beretin resmı sańylaýlar paıda bolǵan. Memleket áleýmettik mindetteme, eldiń qorǵanys qabiletin arttyrý sııaqty óz fýnktsııalaryn atqarýy kerek. Eger salyq jınamasa, Úkimet ol fýnktsııalardy qalaı oryndaıdy? Bul daýsyz másele dep oılaımyn, - dedi Serik Jumanǵarın. 

Onyń paıymdaýynsha, QQS-tyń máni burmalanyp otyr jáne bul burynǵy jyldary júrgizilgen salyq reformalarynyń saldary.