Úkimet kóshpeli mal sharýashylyǵyn damytýǵa nazar aýdarmaq
ASTANA. KAZINFORM – 2026-2030 jyldarǵa arnalǵan mal sharýashylyǵy salasynda agrobıznesti qoldaý men damytýdyń keshendi jobasyn ázirleý bastaldy. Bul týraly Májilis depýtattarynyń saýalyna Premer-mınıstr Oljas Bektenovtiń jaýabynda aıtylǵan.
— Memleket basshysynyń 2025 jylǵy 8 qyrkúıektegi Qazaqstan halqyna Joldaýynda berilgen tapsyrmasyn oryndaý maqsatynda 2026–2030 jyldarǵa arnalǵan mal sharýashylyǵy salasynda agrobıznesti qoldaý men damytýdyń keshendi jobasyn ázirleý bastaldy. Qujatty daıyndaý úshin quramyna memlekettik organdardyń, oblystar ákimdikteriniń, ǵylymı jáne qarjy uıymdarynyń, respýblıkalyq mal sharýashylyǵy palatalarynyń (bir órkeshti jáne qos órkeshti túıeler palatasyn qosa alǵanda), sondaı-aq Parlament depýtattarynyń ókilderi kirgen jumys toby quryldy, — dedi Premer-Mınıstr.
Úkimet basshysynyń dereginshe, keshendi jospar jobasynda túıe sharýashylyǵyn qosa alǵanda, mal sharýashylyǵynyń barlyq baǵyttaryn qoldaý men damytý sharalary kózdelgen. Olardyń qatarynda asyl tuqymdy mal satyp alýǵa jeńildetilgen jáne uzaq merzimdi kredıt berý, «Damý» qory arqyly kepildendirý tetigin engizý (qamtamasyz etý deńgeıi — 80% deıin), salalyq qyzmetkerlerdiń otbasylary úshin áleýmettik jaǵdaı jasaý, dástúrli jaıylymdyq paıdalaný júıesin beıimdeı otyryp, kóshpeli mal sharýashylyǵyn damytý, salany bilikti mamandarmen qamtamasyz etý jáne selektsııa men genetıka salasyndaǵy ǵylymı súıemeldeýdi damytý bar. Sonymen qatar Keshendi josparda jemshóp óndirisin damytýǵa jáne turaqty jemshóp bazasyn qamtamasyz etetin ozyq tehnologııalardy engizýge erekshe nazar aýdarylǵan.
— Qujatqa qosymsha túrde otandyq tuqymdardyń genetıkalyq áleýetin arttyrý, túıe sútin qaıta óńdeýdi damytý jáne sala ónimderiniń eksporttyq áleýetin keńeıtý boıynsha sharalar engizildi. Bul baǵyttar zamanaýı tehnologııalardy engizý jáne daıyn ónim sapasyn arttyrý arqyly iske asyrylady, — dedi Oljas Bektenov.
Buǵan deıin túıe tólin satyp alý sýbsıdııasy bir basqa 175 myń teńgege deıin arttyrý josparlanyp otyrǵanyn jazǵan edik.