Úkimet qorǵanys shyǵyndaryn 120 mlrd teńgege ulǵaıtpaq

ASTANA. KAZINFORM — Premer-mınıstr Oljas Bektenov Senat depýtatynyń saýalyna bergen jaýabynda Qorǵanys ónerkásip keshenin damytý qorynyń jarǵylyq kapıtalyn kóbeıtý týraly bıýdjettik ótinim ázirlengenin málim etti. 

— Qazirgi tańda qordyń jarǵylyq kapıtalyn ulǵaıtý baǵytynda jumystar istelip jatyr. Respýblıkalyq bıýdjetten qarajat bólý úshin 120 mlrd teńge somasyna ótinim daıyndaldy. Syrtqy ınvestıtsııalardy tartý maqsatynda birqatar sheteldik ınvestormen (Qytaı, BAÁ, Túrkııa, Katar, Sıngapýr jáne t. b.) kelissózder júrgizilip jatyr, — dep jazylǵan jaýapta.

Bul qarajat eldiń qorǵanys qabiletin kúsheıtý úshin iriktep alynǵan jobalarǵa baǵyttalmaq.

— Otandyq qorǵanys kásiporyndarynyń damýyn qoldaý jáne yntalandyrý úshin Qorǵanys ónerkásip keshenin damytý qory quryldy. Búgingi tańda qordyń qyzmetin retteıtin tıisti normatıvtik-quqyqtyq baza qabyldanyp, Qarýly Kúshterdiń artıllerııalyq oq-dári, zeńbirek, jaýyngerlik modýl jáne t. b. sııaqty asa mańyzdy ónimderge muqtajdyǵyn qanaǵattandyrýǵa baǵyttalǵan birinshi kezektegi jobalar pýly jasaldy, — dep jazady Premer-mınıstr.

Eske salsaq, aqpan aıynyń aıaǵynda «Qazaqstan Respýblıkasynyń keıbir zańnamalyq aktilerine rezervtegi áskerı qyzmet jáne jekelegen ortalyq memlekettik organdardyń fýnktsııalaryn qaıta bólý máseleleri boıynsha ózgerister men tolyqtyrýlar engizý týraly» zańy maquldanǵan bolatyn.