Úkimet kópbalaly otbasylardyń synyna daıyn ba — Bektenovtiń jaýaby

ASTANA. KAZINFORM — Premer-mınıstr Oljas Bektenov kópbalaly otbasylardyń máselesine qatysty synǵa daıyn ekenin jetkizdi.

Úkimet úıinde ótken baspasóz máslıhatynda Premer-mınıstr Oljas Bektenovke «Kópbalaly otbasylar tarapynan bolatyn synǵa daıynsyzdar ma? — degen saýal qoıyldy.

— Daıynbyz, synnan qorqýdyń qajeti joq. Halyqqa bárin ashyq, shynaıy aıtý kerek. Qazir sizge qalaı túsindirip otyrsam, halyqqa solaı jetý kerek. Tabysy joǵary otbasy men kirisi tómen otbasy birdeı áleýmettik qoldaý almaýy kerek. Biz osy qaǵıdatty ustanamyz. Oryndy syn, aıyptaýdy qoryqpaı qabyldaımyz. Biz tıisti sheshimder qabyldaý úshin jumys isteımiz, — dep jaýap berdi Premer-mınıstr.

Buǵan deıin Úkimet basshysy elimizdegi jónsiz áleýmettik kómekke tosqaýyl qoıylatynyn aıtty. 

Sondaı-aq Oljas Bektenov ákimder men mınıstrlerdi nege ashyq synǵa almaıdy degen saýalǵa jaýap berdi. 

Aıta ketsek, búgin Úkimet otyrysynda Oljas Bektenov Ónerkásip jáne qurylys mınıstri Ersaıyn Naǵaspaevty synǵa alyp, tapsyrma berdi.