Úkimet konteınermen júk tasymaldaýǵa arnalǵan arnaıy baǵdarlama qabyldaıdy — Joldaý

ASTANA. KAZINFORM — Úkimet pen ákimdikter avtokólikpen júk tasymaldaýǵa arnalǵan shekara mańyndaǵy qyzmet sapasyn jaqsartýy kerek. Bul týraly Prezıdent Qasym-Jomart Toqaev Qazaqstan halqyna Joldaýy barysynda aıtty. 

— Sondaı-aq negizgi dálizder aıasynda avtomobıl joldaryn damytýǵa basa mán bergen jón. Qazir elimizde 13 myń shaqyrym avtokólik joldary salynyp, jóndelip jatyr. Jol salǵan kezde tranzıttik dálizderdiń mán-mańyzyna basa kóńil aýdarǵan jón. «Sekseýil-Beıneý» jolynyń qurylysyn tezdetý kerek. Osy joldyń arqasynda Qazaqstan aýmaǵy arqyly Qytaıdan Eýropaǵa júk tasymaldaý merziminiń úshten biri qysqarady. Sonymen qatar kólik júıesin basqarýdyń jańa úlgisin jasaǵan jón. Sebebi memleket ınvestıtsııasynyń ekonomıkalyq qaıtarymy aıqyn bolýy tıis. Konteınermen júk tasymaldaý isine tyń serpin berý kerek. Álemde qurlyq arqyly tasymaldanatyn júktiń 16 paıyzdan astamy konteınermen jiberiledi. Biraq, elimizde onyń úlesi áli de tómen — nebári 7 paıyzǵa jýyq, — dedi Qasym-Jomart Toqaev.

Prezıdenttiń aıtýynsha, Úkimet konteınermen júk tasymaldaý isin jandandyrýǵa arnalǵan arnaıy baǵdarlama qabyldaýy qajet. Onda mýltımodaldi baǵyttardy damytatyn pármendi sharalar da qarastyrylýǵa tıis. Іshki tasymaldyń kólemin jáne básekege qabiletin arttyrý úshin tarıf saıasatynyń tıimdi ári túsinikti bolýy aıryqsha mańyzdy ról atqarady. Qazirgi tarıf qalyptastyrý júıesinde birizdilik joq, ol naryqqa ıkemdelmegen.

— Úkimet jyl sońyna deıin kóliktiń barlyq túrin eskere otyryp, básekege qabiletti tarıf saıasatyn ázirleýge tıis. Júk tasymaldaýshylar rásimderdiń kóp ýaqyt alatynyn aıtyp, jıi shaǵymdanady. Olar ár qyzmetti túrli tsıfrlyq júıe arqyly rásimdeýge májbúr. Tipti, burynǵydaı qaǵaz toltyryp, áýre-sarsańǵa túsip jatady. Keıbir shekara jáne keden beketinde sapaly ınternet joq. Bul da jurttyń narazylyǵyn týǵyzady. Osyndaı keleńsiz jaǵdaılardy tez arada túzetýimiz qajet. Sonymen qatar jasandy ıntellektini qoldana otyryp tasymaldy basqarýdyń keshendi, kópbeıindi tsıfrlyq platformasyn engizý kerek. Bul jumysty tezdetip aıaqtaý qajet. Qazan aıynyń sońyna deıin keden jáne logıstıka qyzmetin kórsetetin Smart Cargo biryńǵaı tsıfrlyq júıesin iske qosqan jón. Bul júıe ınfraqurylymdy jeke kompanııalarǵa avtomatty túrde birdeı qoljetimdi etedi. Shekaradaǵy ótkizý beketteri jańǵyrtylyp jatyr. Bıyl 8 beket tolyǵymen iske qosylady. Aldaǵy 3 jylda taǵy 34 beket jańarady. Bul — óte aýqymdy sharýa. Sebebi, keıbir beketterdiń sapasy syn kótermeıdi, qazirgi zamannyń talabyna saı kelmeıdi, elimizdiń bedeline nuqsan keltiredi. Avtokólikpen júk tasymaldaýǵa arnalǵan shekara mańyndaǵy qyzmet sapasyn jaqsartýdy Úkimet pen ákimdikterge tapsyramyn. Elimizdiń búkil aýmaǵynda kedergisiz tasymaldaý júıesin qalyptastyrý — óte mańyzdy mindet. Tranzıttik júkterdiń «jasyl dáliz» qaǵıdasymen esh tosqaýylsyz ótýine barynsha jaǵdaı jasaý qajet, — dedi Memleket basshysy. 

Aıta keteıik, Joldaýdyń onlaın translıatsııasy Jibek Joly efırinde, sondaı-aq telearnanyń YouTube arnasynda júrip jatyr.

Kazinform saıty tikeleı efırmen qatar, jazbasha translıatsııa da jasaıdy.

Sondaı-aq Joldaý mátinin agenttiktiń telegram arnasynan oqýǵa bolady.