Úkimet kommertsııalyq ıpotekany kóbeıtýdi tapsyrdy: Otbasy bank osal sanattarǵa kóńil bólmek
ASTANA. KAZINFORM – Memlekettik baǵdarlamalarǵa júktemeni azaıtý úshin qoljetimdi kommertsııalyq ıpotekany damytyp, kólemin ulǵaıtý qajet. Bul týraly Premer-Mınıstr Oljas Bektenov tapsyrma berdi.
– Ónerkásip jáne qurylys mınıstrligine Ulttyq bankpen jáne basqa da múddeli memlekettik organdarmen birlesip, ekinshi deńgeıdegi bankterdiń kommertsııalyq ıpotekasyn jáne turǵyn úımen qamtamasyz etý quraldaryn odan ári jetildirý boıynsha jańa tásilderdi ázirleýdi tapsyramyn. Otbasy bank óz kezeginde, halyqtyń osal sanattaryn qoldaýǵa basa kóńil bólýge tıis, – dedi O.Bektenov Úkimettiń búgingi otyrysynda.
Sonymen birge, Ónerkásip jáne qurylys mınıstrligine 1 shildege deıin qabyldanǵan Qurylys kodeksi aıasynda normatıvtik aktilerdi ýaqytyly jańartyp, qabyldaýdy, olardy iske asyrý kezinde úzdiksiz baqylap otyrý tapsyryldy. Oǵan qosa, qurylys kólemi jyl saıyn ulǵaıyp, qurylys materıaldaryna suranys artyp keledi.
– Tapshylyq pen baǵanyń ósýine jol bermeý, sondaı-aq otandyq óndiristi qoldaý maqsatynda qajetti qurylys materıaldary men jabdyqtaryn shyǵarý júzege asyrylyp jatyr. Bıyl elimizde osyndaı 38 jańa jobany iske qosý josparlanǵan. Ónerkásip mınıstrligi «Báıterek» holdıngimen birlesip, olardyń ýaqytyly iske qosylýyn qamtamasyz etsin, – dedi Oljas Bektenov.
Buǵan deıin Premer-mınıstr óńirlerde qoljetimdi baspanamen qamtý baǵdarlamacyn jandandyrý kerektigin aıtqan edi.
Byltyr qurylystyń sapasyna qatysty resmı túrde 63 myńnan astam shaǵym kelip túsken.
