Úkimet kólikterdi tehnıkalyq baıqaýdan úsh jylda bir ret ótkizý usynysyna jaýap berdi

ASTANA. KAZINFORM — Premer-mınıstrdiń birinshi orynbasary Roman Sklıar Májilis depýtattarynyń kólikterdi tehnıkalyq baıqaýdan ótkizý tártibin ózgertý týraly saýalyna jaýap berdi. 

— Jalpy, tehbaıqaý jol qaýipsizdigine áser etýi múmkin aqaýlardy ýaqtyly anyqtaýǵa baǵyttalǵan profılaktıkalyq fýnktsııany oryndaıdy. Tehnıkalyq sebepterge baılanysty jol-kólik oqıǵalarynyń úlesi az bolǵanymen, tipti bir aqaýlyq (tejeý júıesi, rýldik basqarý jáne t. b.) aýyr zardaptarǵa, sonyń ishinde adam ólimine ákelýi múmkin. Tehbaıqaýdyń úsh jyldyq aralyǵyna kóshý, ásirese eldegi avtomobılderdiń ortasha jasyn (10 jastan joǵary) eskere otyryp, avtokóliktiń tehnıkalyq jaramdylyq deńgeıiniń tómendeýine ákelýi múmkin, — dep jazady birinshi vıtse-premer.

Onyń paıymdaýynsha, jyl saıynǵy baqylaýdan bas tartý kólik quraldaryn durys paıdalanbaýdyń ósýine jáne sonyń saldarynan apattylyqtyń artýyna ákelýi múmkin.

— Ýákiletti organdar anyqtaǵan tehbaıqaý operatorlary tarapynan buzýshylyqtardyń jekelegen jaǵdaılary júıeni baqylaýdy kúsheıtý jáne reformalaý qajettigin rastaıdy. Ákimshilik máseleler qaýipsizdik sharalaryn álsiretý arqyly emes, tsıfrlandyrý, qadaǵalaýdy kúsheıtý jáne operatorlarǵa qoıylatyn talaptardy qatańdatý arqyly sheshilýi kerek. Jol jaǵdaıy men avtopark qurylymy Qazaqstanǵa uqsas elderdiń kóbinde eski avtomobılder úshin jyl saıynǵy tehbaıqaý jıiligi saqtalady. Usynylǵan úsh jyldyq aralyq kólik qaýipsizdigi salasyndaǵy halyqaralyq standarttarǵa sáıkes kelmeıdi. Joǵaryda aıtylǵandardy eskere otyryp, mindetti tehbaıqaýdan ótý tártibine ózgerister engizý merziminen buryn dep sanaımyz, — delingen jaýapta.

Іshki ister mınıstrliginiń resmı málimeti boıynsha, 2025 jyldyń alǵashqy 7 aıynda 176 bala kólik apatynan kóz jumǵan.