Úkimet kólik ınfraqurylymyn damytýǵa baǵyttalǵan júıeli sharalar keshenin qabyldady
ASTANA. KAZINFORM — Prezıdenttiń «Ádiletti Qazaqstannyń ekonomıkalyq baǵdary» atty Qazaqstan halqyna Joldaýynda berilgen tapsyrmasyn oryndaý maqsatynda Úkimet jol ınfraqurylymyn jaqsartatyn aýqymdy memlekettik baǵdarlamany iske asyryp jatyr. Atap aıtqanda, ol elimizdiń kólik jelisin damytýǵa baǵyttalǵan. Bul jaıynda Úkimettiń baspasóz qyzmetinen habarlandy.
2024 jyly jol-qurylys jumystarynyń kólemi rekordty 12 myń shaqyrymǵa jetedi, onyń 8 myń shaqyrymy — elimizdiń óńirlerin baılanystyratyn strategııalyq mańyzy bar kólik kúre joldaryn qamtamasyz etetin respýblıkalyq joldar. Qalǵan 4 myń shaqyrymy — jergilikti mańyzy bar joldar.
Jyl sońyna deıin 7 myń shaqyrym joldyń qurylysy, rekonstrýktsııasy jáne jóndeý jumystary aıaqtalady dep josparlanǵan.
Búgingi tańda, mysaly, «Qaraǵandy — Almaty», «Taldyqorǵan — Óskemen» jáne «Aqtóbe — Atyraý — Astrahan» sııaqty iri kólik kúre joldaryn rekonstrýktsııalaý jumystary aıaqtalady.
Bul jobalar jol júrý ýaqytyn qysqartady, kólik shyǵyndaryn azaıtady ári jol qaýipsizdigin arttyrady. Atalǵan jobalardyń jalpy uzyndyǵy — 2 myń shaqyrym.
Túrkistan oblysynda Shaqpaq baba asýynda týnnel qurylysy aıaqtalyp qaldy. Onyń uzyndyǵy — 840 metr. Qurylys aımaq úshin úlken mańyzǵa ıe, óıtkeni asý «Batys Eýropa — Batys Qytaı» kólik dáliziniń kúrdeli bóligi sanalady.
Qazirgi ýaqytta beton men asfalt tóselip, negizgi qurylys jumystary aıaqtaldy. Búginde beınebaqylaý júıelerin, jeldetý jáne órtke qarsy jabdyqtardy ornatý boıynsha iske qosý-retteý jumysy júrgizilýde.
Kólik ınfraqurylymyn damytýdaǵy taǵy bir mańyzdy obekt — Almaty oblysyndaǵy Shamalǵan stansasynda avtomobıl joly ótpesiniń salynýy. Ótkeldiń ashylýy avtokólikterdiń temir joldardan qaýipsiz ári kedergisiz ótýin qamtamasyz etýi tıis.
Qazaqstannyń shyǵysynda uzyndyǵy 1 316 metr Buqtyrma sý qoımasy arqyly ótetin kópir ótkeliniń qurylysy aıaqtalýda.
Kópirdiń ózinen bólek, joba jalpy uzyndyǵy 19 shaqyrym bolatyn kirme joldyń qurylysyn qamtıdy, bul Shyǵys Qazaqstan oblysynda kólik qatynasyn jaqsartýǵa múmkindik beredi. Qazirgi ýaqytta 21 tirekti ornatý jáne 20 metall aralyqty montajdaý jumystary aıaqtaldy.
Kópir men kirme jolǵa asfaltbeton jamylǵysyn tóseý jumysy júrgizilýde.
Bul kópir óńir úshin strategııalyq mańyzǵa ıe, óıtkeni buryn shalǵaı aýdandardyń turǵyndary parom ótkelin paıdalanýǵa májbúr bolǵan. Jańa kópir jol júrý ýaqytyn qysqartyp qana qoımaıdy, sonymen qatar qozǵalys qaýipsizdigin qamtamasyz etedi.
Qazaqstan Respýblıkasynyń Kólik mınıstrligi jol ınfraqurylymyn damytýdyń 2029 jylǵa deıingi uzaqmerzimdi strategııasyn odan ári iske asyrýda.
Máselen, bul baǵdarlamaǵa «Aqtóbe — Ulǵaısyn», «Qaraǵandy — Jezqazǵan» sııaqty perspektıvaly jobalar jáne Saryaǵash qalasyn aınalyp ótý qurylysy engizilgen.
Barlyq joba bir merdiger uıymnyń joldy jobalap, salýyn jáne keıinnen kútip ustaýyn kózdeıtin ERSM-kelisimsharty boıynsha iske asyrylatyn bolady.
Sonymen qatar Qazaqstannyń ońtústik jáne ortalyq óńirlerin baılanystyratyn «Qyzylorda — Jezqazǵan» avtojolyn rekonstrýktsııalaý jumysy bastaldy.
Rekonstrýktsııa jol tósemin jaqsartý, jol jıekterin nyǵaıtý jáne ınfraqurylymdy jańǵyrtý boıynsha keshendi jumysty qamtıdy.
Bul joba uzaq ýaqytqa sozylǵan problemalardy sheshýge múmkindik beredi jáne osy magıstral boıynsha qaýipsiz ári jaıly qozǵalysty qamtamasyz etedi.
Buǵan qosa, avtojol ınfraqurylymyn damytý sheńberinde QDB arqyly qarjylandyrylatyn, qurylymdy kúsheıte otyryp, joldardy ortasha jóndeýdiń aýqymdy baǵdarlamasy iske qosyldy.
Atalǵan baǵdarlama 20 jyldan astam jóndeý júrgizilmegen ýchaskelermen qosa, 2,5 myń shaqyrym respýblıkalyq joldardy qamtıdy.
Jobalar tizbesine «Jezqazǵan — Petropavl», «Qandyaǵash — Shalqar — Yrǵyz», «Qaraǵandy — Aıagóz — Boǵas» jáne «Semeı — Barnaýl» joldaryn ortasha jóndeýden ótkizý engizilgen.
Bul jobalardy iske asyrý aldaǵy jyldarǵa qaýipsiz ári jaıly qozǵalysty qamtamasyz ete otyryp, búkil el boıynsha joldardyń jaǵdaıyn jaqsartýǵa yqpal etedi.
