Úkimet Qyzylorda oblysyndaǵy egin alqaptaryn sýmen qamtýǵa 1 mlrd teńge bóldi

ASTANA. KAZINFORM — Úkimet rezervinen Qyzylorda oblysynyń qajettilikteri úshin 53 jyljymaly dızeldi sorǵy stanasyn satyp alýǵa shamamen 1 mlrd teńge bólindi. QR Premer-mınıstri Oljas Bektenov tıisti qaýlyǵa qol qoıdy. Bul týraly Úkimettiń baspasóz qyzmeti málim etti.

Qazaqstan Respýblıkasy Prezıdenti Qasym-Jomart Toqaevtyń agrarlyq sektordy turaqty túrde sýmen qamtamasyz etý boıynsha bergen tapsyrmasyn iske asyrý aıasynda júzege asty. 

Mamandardyń esebinshe, jańa jabdyq magıstraldi arnalarda sý deńgeıi tómen bolǵan kúnniń ózinde 6 myńnan astam gektar jerdi sýaryp turýǵa múmkindik beredi. Sorǵy stansalary magıstraldi jáne sharýashylyqtar aralyǵyndaǵy arnalardan ishki sharýashylyq jelilerine sý jiberý úshin qoldanylady.

Óńirde 126,4 myńnan astam gektar jerge sýarmaly egin egilgen, onyń 82,4 myń gektary kúrish. Aǵymdaǵy sýarý maýsymynda josparlanǵan sý kólemi 2,5 mlrd tekshe metr quraıdy.

Oblys ákimdigi «Qazsýshar» RMK-niń Qyzylorda fılıalymen birlese arnaıy monıtorıng tobyn jasaqtap, Syrdarııadan kelip jatqan sý kólemine sáıkes, bes magıstraldi jáne úsh sharýashylyqtar aralyǵyndaǵy arnalarǵa sý berý kestesin ázirlep, bekitti.

Qyzylorda oblysynyń agroónerkásiptik kesheni transshekaralyq sý resýrstaryna tikeleı táýeldi ekenin eskere otyryp, óńirdi turaqty túrde sýmen qamtamasyz etip, astyq ónimdiligin jáne azyq-túlik qaýipsizdigin saqtaý memlekettiń basty mindeti bop qalady.

Eske sala keteıik, sýarý maýsymy bastalǵaly aýyl sharýashylyǵynyń qajettiligine 8 mlrd tekshe metrden astam sý jiberildi.