Úkimet qysqy Olımpıada oıyndaryna sportshylarymyzdyń daıyndyǵyn pysyqtaıdy
ASTANA. KAZINFORM — Búgin Úkimet otyrysy ótedi. Onda Mınıstrler kabınetiniń músheleri Italııada ótetin qysqy Olımpıada oıyndaryna sportshylarymyzdyń daıyndyǵyn pysyqtaıdy. Sondaı-aq, Úkimettiń keler jylǵa arnalǵan zań jobalaý jospary bekitiledi.
Taıaýda Týrızm jáne sport mınıstrligi Sportty damytý dırektsııasynyń qoǵammen baılanys bóliminiń ókili Turlyjan Áıtenov kelesi jyldyń 6-22 aqpany aralyǵynda Italııanyń Mılan men Kortına-d’Ampetstso qalalarynda ótetin XXV qysqy Olımpıada oıyndaryna dál qazirgi tańda Qazaqstan qorjynynda 23 lıtsenzııa bar ekenin aıtqan bolatyn. Onyń 2-eýi - mánerlep syrǵanaýdan, 9-y – short-trekten, 12-si – konkımen júgirýden. Qalǵan sport túrleri boıynsha irikteý áli jalǵasyp jatyr.
Lıtsenzııalyq týrnırlerdiń basym bóligi qańtar aıynyń sońyna deıin aıaqtalady. Sonyń nátıjesinde Qazaqstan jalpy 90-ǵa jýyq lıtsenzııaǵa qol jetkizýi múmkin. Alaıda Olımpıadaǵa baratyn sportshylar sany lıtsenzııadan áldeqaıda az bolady.
– Bir sportshy birneshe qashyqtyqta nemese birneshe dıstsıplınada óner kórsete alady. Mysaly, short-trekte 4 sportshy baryp, 9 lıtsenzııany paıdalanady. Sondyqtan shamamen 30–35 sportshy Olımpıadaǵa attanady dep josparlap otyrmyz, – degen edi mınıstrlik ókili.
Bıatlon, shańǵy jarysy, frıstaıl-mogýl jáne frıstaıl-akrobatıka sekildi sport túrlerinen lıtsenzııalyq irikteý áli aıaqtalǵan joq. Álem kýboktary bitken soń halyqaralyq reıtıng jarııalanyp, úzdik sportshylar Olımpıada joldamasyn alady. Al ulttyq quramalardyń daıyndyǵy maýsym boıy Eýropada ótetin álem kýboktary arqyly júrgizildi. Olımpıadaǵa sportshylar jarys bastalardan bir apta buryn baryp, jergilikti klımatqa beıimdeledi.
Memleket tarapynan Olımpıada júldegerlerine qomaqty syıaqy qarastyrylǵan:
- altyn medal úshin – 250 myń dollar
- kúmis úshin – 150 myń dollar
- qola júldege – 75 myń dollar tólenedi.
- Tipti 5-orynǵa deıin yntalandyrý syıaqysy bar.
Ótip bara jatqan jyl ishinde Úkimet 19 zań jobasyn ázirleýdi kózdegen bolatyn. Josparlanǵan 19 zań jobasynyń 6-aýy jańa redaktsııadaǵy zań jobalary, 13-i qoldanystaǵy zańdarǵa túzetýler engizedi. Olardyń ishinde bankter týraly, quqyq buzýshylyqtyń aldyn alý týraly, sonymen qatar respýblıkalyq bıýdjet jáne Ulttyq qordan kepildendirilgen transfert týraly jyl saıynǵy negizde ázirlenetin zańdardy Májilis qabyldady.
Aıta keteıik, ótken aptadaǵy Úkimet otyrysynda «Іsker aımaq» shaǵyn bıznesti qoldaýdyń biryńǵaı baǵdarlamasy qabyldandy. Baǵdarlama shaǵyn kásipkerlikti, eń aldymen, aýyldyq eldi mekender men shaǵyn qalalarda aýqymdy damytýǵa, jedel áleýmettik-ekonomıkalyq tıimdilikti qamtamasyz etetin tehnologııalyq jaǵynan qarapaıym, tez iske asyrylatyn jobalarǵa baǵyttalǵan.
Baǵdarlamanyń basymdyǵy qosylǵan qunnyń jergilikti tizbegin, ornyqty óndiristik bazany jáne uzaq merzimdi ekonomıkalyq áserdi qalyptastyratyn aýyl sharýashylyǵy shıkizatyn qaıta óńdeý, shaǵyn naýbaıhanalar, sút jáne et jartylaı fabrıkattary, tamaq óndirý, aǵash óńdeý, jıhaz tsehtary jáne qurylys materıaldaryn óndirý, qolóner jáne ózge de baǵyttar sanalady. Negizgi tásili — óńirlik áleýetti jáne qajettilikterdi eskere otyryp, jergilikti atqarýshy organdardyń basym salalardyń qosymsha tizbesin qalyptastyrý arqyly kásipkerlikti damytý úshin óńirlerdi ortaq jaýapkershilikke tartý.
Baǵdarlamada óńirlik ekonomıkanyń qurylymyn kórsetetin sýbsıdııalaý lımıtteriniń eki deńgeıli júıesi kózdeledi. Birinshi deńgeı — Abaı, Ulytaý, Jetisý, Soltústik Qazaqstan jáne Qyzylorda oblystary úshin bıýdjettiń 30 paıyzyna deıin sýbsıdııa bólý. Ekinshi deńgeı — qalǵan óńirlerge sýbsıdııalar bıýdjetiniń 70 paıyzyna deıin bólý. Eki deńgeı boıynsha qarjylandyrýdyń qoljetimdiligi kredıttiń búkil merzimine negizgi borysh somasynyń 80 paıyzyna deıin «Damý» qorynyń kepildikterin berýdi qosa alǵanda, sýbsıdııalaý jáne kepildik berý tetikteriniń úılesimimen qamtamasyz etiledi.
Premer-mınıstrdiń orynbasary — Ulttyq ekonomıka mınıstri Serik Jumanǵarınnyń aıtýynsha, baǵdarlama óńirlerde turaqty kásipkerlik ortany qalyptastyrýǵa baǵyttalǵan jáne ekonomıkalyq damý men bıýdjettik ornyqtylyq arasyndaǵy tepe-teńdikti qamtamasyz etedi.
— Budan basqa, «Іsker aımaq» baǵdarlamasyna qatysýshylar Óńdeý ónerkásibindegi shaǵyn jáne orta bıznes kásiporyndaryn jaraqtandyrý men qaıta jaraqtandyrýdyń jańa baǵdarlamasyna qatysý múmkindigine ıe bolatynyn atap ótkim keledi. Lızıng boıynsha baǵdarlamany iske asyrý 2 myńnan astam jumys istep turǵan kásiporyndardy jańǵyrtýǵa, eńbek ónimdiligi men kásiporyndardyń básekege qabilettiligin arttyrýǵa múmkindik beredi. Qarjylandyrý qosymsha kepilsiz júzege asyrylady, — dedi ol.
Qarjy mınıstri Mádı Takıev salyqty ákimshilendirýdiń servıstik modeli qazirgi júıeden nesimen erekshelenetinin aıtty.
— Negizgi tásil — «baqylaý úshin ǵana baqylaý» saıasatynan ketip, salyq tóleýshi júıege tirkelgen sátten bastap onyń búkil qyzmetine servıstik súıemeldeýge kóshemiz. Bul Memlekettik kirister komıtetiniń ekinshi deńgeıdegi bankterdiń jáne basqa da tsıfrlyq arnalardyń platformalarynda elektrondyq servıster men ıntegratsııalardy damytý arqyly qamtamasyz etiledi. Onyń ishinde: deklaratsııalardy aldyn ala toltyrý jáne avtomatty túrde deklaratsııalaý; salyq esebin berý merziminiń bastalýy sııaqty mańyzdy oqıǵalar týraly push-habarlamalar jiberip otyrý; memlekettik bajdy avtomatty túrde qaıtarý nemese salyqtardy esepke jatqyzý sııaqty jekelegen protsesterdi «ótinishsiz» formatta kórsetý kózdelip otyr, — dedi mınıstr.
Sonymen qatar ol 2026 jyldyń 1 qańtarynda salyqpen tikeleı jumys isteıtin mamandarǵa arnalǵan «Halyq býhgalteri» aktsııasy bastalatynyn atap ótti.
Osy oraıda Býhgalterler odaǵynyń tóraǵasy Mereke Jumatov «Halyq býhgalteri» bastamasyna tegin úles qosatyndaryn málim etti.
— Biz Qarjy mınıstrliginiń bastamasyn qoldaımyz jáne óz resýrstarymyz ben aýdıtorııalarymyzdy, onlaın alańdarymyzdy, tálimgerlerimizdi aqysyz negizde usynamyz. Bizdiń akkredıttelgen oqý ortalyqtarymyzdyń Memlekettik kirister komıtetimen birlese otyryp bıznesti kezeń-kezeńmen daıyndaýǵa arnalǵan jol kartasyn ázirlep jatyr, — dedi ol.
Premer-mınıstr Oljas Bektenov Býhgalterler odaǵynyń bıznesti tegin oqytý jáne keńes berý baǵdarlamasyn ázirleý usynysyna qoldaý bildirdi.
— Búgin Býhgalterler odaǵy bıznesti tegin oqytý jáne keńes berý baǵdarlamasyn iske qosý jóninde ıgi bastama kóterdi. Memlekettik organdarǵa bul protsesti tolyq qoldap, járdem kórsetýdi tapsyramyn. Jumys barlyq jerde, tipti aýyl-aımaqtarǵa deıin júrgizilýge tıis. Býhgalterler odaǵy, salalyq qaýymdastyqtar men uıymdar memlekettik kirister organdary men ákimdikterdiń qajetti ınfraqurylymyn paıdalana alady, — dedi Oljas Bektenov.
Sonymen qatar Úkimet basshysy salyq organdarynyń mindeti – qatelikter úshin jazalaý emes, qatelespeýge kómektesý ekenin eskertti.
Qarjy mınıstrligine «Іsker aımaq» baǵdarlamasyn qarjylandyrýdy qamtamasyz etýdi tapsyrdy.
— Qarjy mınıstrligi «Іsker aımaq» baǵdarlamasyn qarjylandyrýdy qamtamasyz etsin. Baǵdarlamany jergilikti bıýdjetter esebinen de qosa qarjylandyrý kózdelýi qajet. Óńir ákimdikteri birinshi deńgeıdegi sýbsıdııalardy bólý úshin aımaqtardyń ereksheligin eskere otyryp, barynsha qysqa merzimde basym salalardyń tizbesin qalyptastyrsyn. Shaǵyn bıznestiń óndiristik ınfraqurylymǵa qoljetimdiligin qamtamasyz etip, óndiristik ǵımarattardy jeńildikpen jalǵa alýyna múmkindik jasaǵan jón, — dedi Úkimet basshysy.