Úkimet kıik sanyn retteý jáne múıizderin tańbalaý máselesin qarady
ASTANA. KAZINFORM — Premer-mınıstrdiń birinshi orynbasary Roman Sklıardyń tóraǵalyǵymen kıikter popýlıatsııasyn turaqty basqarý boıynsha ótkizilgen is-sharalardyń qorytyndylary tyńdaldy. Bul týraly Úkimettiń baspasóz qyzmeti habarlady.
Keńeste Ekologııa jáne tabıǵı resýrstar mınıstri Erlan Nysanbaev, sondaı-aq basqa da memlekettik organdardyń ókilderi sóz sóıledi.
Ekologııa mınıstrliginiń derekteri boıynsha Qazaqstandaǵy kıikterdiń sany búgin rekordtyq deńgeıge jetti 4 mln daraq, sondaı-aq tóldeýden keıin shamamen 5 mln daraq boldy. Osyndaı qarqyndy ósýdi eskere otyryp, ýákiletti organdar Zoologııa ınstıtýty daıyndaǵan bıologııalyq negizdeme negizinde aýyl sharýashylyǵyna zııan keltirmeý jáne ekojúıelik tepe-teńdikti saqtaý úshin janýarlar sanyn turaqty basqarý boıynsha is-sharalar júrgizdi.
Máselen, osy jyly 1 shildeden 30 qarashaǵa deıin 196 myńǵa jýyq daraq tárkilendi, ushalary otandyq et óńdeý kásiporyndaryna berildi. Jumystar ǵylymı usynymdarǵa sáıkes qatań túrde júrgizildi.
— Derıvattardy esepke alýǵa jáne saqtaýǵa erekshe nazar aýdarylady. Kıikterdiń barlyq múıizi eskerilip, tańbalanyp, mınıstrlikke vedomstvolyq baǵynysty «Ohotzooprom» ÓB» RMQK uıymynda kúsheıtilgen kúzet jáne mamandandyrylǵan ınfraqurylym jaǵdaılarynda saqtalady.
Derıvattardy tsıfrlyq tańbalaý jáne halyqaralyq retteý máseleleri jeke qaraldy. «Qazaqtelekom» AQ-men birlesip tolyq qadaǵalaýdy jáne zańdy aınalymdy qamtamasyz etetin kıik múıizderin tańbalaý jobasy júzege asyrylyp jatyr. Usynylǵan júıe CITES Halyqaralyq konferentsııasynda qoldaý tapty jáne qazaqstandyq derıvattardyń eksportyna shekteýlerdi kezeń-kezeńimen alyp tastaý úshin negiz retinde qarastyrylady, — delingen Úkimet habarlamasynda.
Jıyn qorytyndysy boıynsha Roman Sklıar Ekologııa jáne tabıǵı resýrstar mınıstrligine jáne basqa da múddeli memlekettik organdarǵa 2026 jylǵa kıik sanyn turaqty basqarýǵa daıyndyq boıynsha sharalar qabyldaýdy, sondaı-aq CITES sheshimderin eskere otyryp, derıvattardyń tańbalanýy men aınalymy jónindegi normatıvtik bazany qalyptastyrýdy aıaqtaýdy tapsyrdy.
Aıta ketelik Batys Qazaqstanda kıik etin óńdeý keshenin salý kózdelip otyr.