Úkimet kıik sanyn retteý máselesin ańshylyq qojalyqtarǵa da berýge qarsy — Májilis depýtaty
ASTANA. KAZINFORM — Májilis depýtattarynyń kıik sanyn retteý máselesin ańshylyq qojalyqtarǵa da berý usynysyna Úkimet qarsylyq tanytty. Bul týraly búgin Májilistiń jalpy otyrysynda depýtat Dúısenbaı Turǵanov aıtty.
Aıta keteıik, palatanyń jalpy otyrysynda «Ańshylyq salasy jáne janýarlar dúnıesin saqtaý máseleleri boıynsha Qazaqstan Respýblıkasynyń keıbir zańnamalyq aktilerine ózgerister men tolyqtyrýlar engizý týraly» jáne oǵan ilespe zań jobalary birinshi oqylymda talqylanyp jatyr. Talqylaý barysynda depýtattar baıandamashydan qujat aıasynda kıik sanyn retteý úshin taǵy qandaı sharalar qoldanylatyn suraǵan edi.
— Qazirgi tańda kıik sanyn retteý máselesi túbegeıli monopolııa retinde «Ohotzooprom» mekemesine berilgen. Biraq, bizdiń pikirimiz ózgeshe. Kıik basy 5 mln-nan asyp ketkennen keıin olardyń sanyn retteý aýyl sharýashylyǵy qojalyqtary úshin de túbegeıli másele bolyp tur. Sondyqtan biz óz usynysymyzdy bergen edik. Retteý máselesi tek «Ohotzooprom» mekemesinde ǵana bolmaýy kerek. Odan basqa ańshylyq qojalyqtar bar. Solarǵa da ańshylyq ádispen kıik sanyn retteýdi berýdi usyndyq. Biraq, Úkimet bizdi qoldaǵan joq. Sondyqtan bul másele áli ashyq qalyp otyr, — dedi Dúısenbaı Turǵanov.
Buǵan deıin Ekologııa jáne tabıǵı resýrstar mınıstrligi 2025 jyly kıik popýlıatsııasynyń sanyn retteý aıasynda tabıǵı ortadan 196 173 kıik aýlanǵanyn málim etken edi.
