Úkimet kelesi jyly Ulttyq qordan 1,6 trln teńge transfert tartady

Búgin Senattyń jalpy otyrysynda «Ulttyq qordan 2024 - 2026 jyldarǵa arnalǵan kepildendirilgen transfert týraly» zań maquldandy, dep habarlaıdy Kazinform.

«Bıýdjettiń kiris bóligindegi kepildendirilgen jáne nysanaly transfert kólemi Ulttyq qordyń jınaq fýnktsııasyn qamtamasyz etý jónindegi Bıýdjet kodeksiniń erejelerin eskere otyryp aıqyndalǵan. Sizderdiń qaraýyńyzǵa usynylǵan Ulttyq qordan 2024-2026 jyldarǵa arnalǵan kepildendirilgen transfert týraly zańy osy talaptardy eskere otyryp ázirlendi. Bul rette Úkimet kepildendirilgen transferttiń mólsherin ekinshi jyl bıýdjettik qaǵıdalardy qoldana otyryp anyqtap otyr. Bul qaǵıdalar Ulttyq qor qarajatynyń saqtalýyn qamtamasyz etýge jáne onyń valıýta aktıvterin 2030 jylǵa qaraı 100 mlrd AQSh dollaryna deıin jetkizýge yqpal etedi», - dedi Ulttyq ekonomıka mınıstri Álibek Qýantyrov.

Onyń aıtýynsha, zańda munaıdyń kesimdi baǵasy 2024 jyly barreline 43,4 AQSh dollaryn, 2025-2026 jyldary barreline 40,2 – 41,8 dollar deńgeıinde belgilengen.

Osyny eskere otyryp, Ulttyq qordan kepildendirilgen transferttiń mólsheri 2023 jyly 2,2 trln teńgeden 2024-2026 jyldary jyl saıyn 2 trln teńgege deıin tómendeýmen aıqyndaldy.

«Sondaı-aq 2024 jyly ulttyq aýqymdaǵy áleýmettik mańyzy bar jáne strategııalyq mańyzdy ınfraqurylymdyq jobalardy qarjylandyrý úshin Ulttyq qordan 1,6 trln teńge kóleminde nysanaly transfert tartý josparlanyp otyr. Josparly kezeńde Ulttyq qordyń valıýtalyq aktıvteri 2024 jyly 68 mlrd AQSh dollaryna deıin qalpyna keltirilip, odan ári 2025-2026 jyldary 80,7 – 93,3 mlrd dollarǵa deıin ósedi dep eskerilgen», - dedi mınıstr.