Úkimet Qazposhtany qoldaý tetikterin pysyqtap jatyr

ASTANA. KAZINFORM — Májilis depýtaty Erlan Saırovtyń gazet-jýrnaldardy aýyldarǵa jetkizý tarıfteriniń baǵasyn turaqtandyrý sharalary, «Qazposhta» jáne «Qaztelekom» qyzmetkerleriniń jalaqysyn ósirý máselesin kóterdi. 

— Jaqynda ǵana depýtattar Batys Qazaqstan men Shyǵys Qazaqstannyń shekaradaǵy aýdandaryna baryp keldi. «Qazposhta» aýylǵa gazet taratý baǵasyn 140 paıyzǵa kóterip jibergen. Osyǵan deıin bir gazetti ákelý 17 teńge bolsa, qazir 42 teńge shamasynda. Sonda, shekaralas aýdanda turatyn 3,5 mln adamnyń kelesi jyly birqatar gazetti oqýǵa materıaldyq shamasy jetpeı qalady. Bul turǵyda «Qazposhtanyń» ózi kómektesýi kerek. Óıtkeni shalǵaıdaǵy aýyldarǵa aqparat pen tólemderdi «Qazposhta» jetkizip jatyr. Osy gazetterdi aparýǵa kómektesý úshin qazir qandaı is-sharalar qarastyrylǵan? Sonymen qatar, «Qazposhtanyń» aýyldaǵy qyzmetkerleriniń materıaldyq jaǵdaıyn jaqsartýda qandaı jospar bar? , — dep surady Erlan Saırov Májilistiń jalpy otyrysynda.

Óz kezeginde Jasandy ıntellekt jáne tsıfrlyq damý vıtse-mınıstri Dosjan Musalıev gazetti taratý tarıfi osy jyly kóterilgenin aıtty.

— Eski tarıf 2017 jyly bekitilgen. Sol kezden beri 17 teńgeden kóterilmedi. Inflıatsııaǵa qarap, 2025 jyly mamyr aıynda kóterdik. Qazir Mádenıet jáne aqparat mınıstrligimen birlese «Qazposhtany» qoldaýǵa qatysty basqa da tásilderdi pysyqtap jatyrmyz, — dedi Dosjan Musalıev.

Bul turǵyda Mádenıet jáne aqparat vıtse-mınıstri Evgenıı Kochetov qazir «Qazposhta» basshylyǵymen atalǵan másele qarastyrylyp jatqanyn jetkizdi.

Atap aıtqanda, tarıf boıynsha kelissóz júrip jatyr. Sondyqtan jaqyn arada tıisti sheshim jasalady.

Aıta ketý kerek, poshta salasyndaǵy qyzmetterge tólenetin sýbsıdııa mólsherin Jasandy ıntellekt jáne tsıfrlyq damý mınıstrligi aıqyndaıdy. Al byltyr osy vedomstvo ókili gazet-jýrnal jetkizý qyzmetin Mádenıet jáne aqparat mınıstrligine berýge qarsy emes ekenderin málimdegen bolatyn.