Úkimet Qazaqstannyń 2030 jylǵa deıingi saýda saıasaty tujyrymdamasyn bekitti
ASTANA. KAZINFORM - Qazaqstan 2030 jylǵa deıin saýda salasyn tsıfrlyq tehnologııalarǵa negizdelgen, ashyq ári tıimdi ekojúıege aınaldyrýdy kózdeıdi. Saýda el ekonomıkasynyń eń iri sektorlarynyń biri bolyp qala bermek. Jańa tujyrymdama zamanaýı saýda ınfraqurylymyn qalyptastyrýdy, otandyq óndirýshilerdi qoldaýdy, eksportty ulǵaıtýdy jáne tutynýshylar quqyǵyn qorǵaýdy kúsheıtýdi maqsat etedi. Atalǵan qujat bıyl 27 qarashadan bastap kúshine endi.
Úkimettiń málimetinshe, saýda ekonomıkanyń negizgi salalarynyń biri bolyp qala beredi. 2024 jyly osy salada 1,5 mıllıonnan astam adam jumys istegen, bul eldegi barlyq jumys isteıtinderdiń 16,6%-yn quraıdy. Sońǵy 10 jylda sala 228 myń jańa jumys ornyn ashty. Sonymen qatar byltyr saýda sektorynda 806 myńnan astam kásipkerlik sýbektisi tirkelip, Qazaqstandaǵy barlyq kásiporyndardyń úshten birinen astamyn qurady.
2030 jylǵa deıingi saýda saıasatynyń mıssııasy ol ishki jáne syrtqy naryqtarda taýarlardy óndirý, saqtaý jáne ótkizý arasyndaǵy turaqty da ashyq baılanysty qalyptastyrý.
Mundaı júıe barlyq qatysýshylar úshin qolaıly jaǵdaı jasaýy tıis:
Tutynýshylarǵa - otandyq jáne sheteldik taýarlarǵa ádil baǵamen qol jetkizý;
óndirýshilerge - boljamdy ótkizý arnalary;
bızneske - zańdy ári yńǵaıly jumys jaǵdaılary.
- Tujyrymdama saýdanyń tsıfrlyq tehnologııalarǵa, saýda protsesteriniń joǵary tıimdiligine, adal básekelestik qaǵıdattaryna, tutynýshylardyń múddesin qorǵaýǵa, otandyq óndiristi qoldaýǵa, jahandyq jetkizý tizbekterine ıntegratsııalanýǵa jáne Qazaqstannyń Ortalyq Azııadaǵy negizgi saýda-logıstıkalyq hab retinde damýyna negizdelgen ekojúıesin qalyptastyrýǵa baǵyttalǵan, - delingen qujatta.
Saýda óz basymdyqtary, syn-qaterleri jáne damý strategııasy bar derbes ekonomıka salasy retinde qarastyrylady. Negizgi maqsat el men azamattardyń ekonomıkalyq múddelerin qorǵaý.
Damýdyń úsh negizgi baǵyty zamanaýı saýda ekojúıesin qalyptastyrýdy, otandyq óndiristi qoldaý men eksportty ulǵaıtýdy, sondaı-aq tutynýshylardyń quqyqtaryn qorǵaýdy kúsheıtýdi qamtıdy.
Zamanaýı saýda ekojúıesin qurý salanyń tsıfrlyq transformatsııasyn, ınnovatsııalyq tehnologııalardy engizýdi, elektrondyq jáne bırjalyq saýda formatyn damytýdy, sondaı-aq naryqtar men kóterme alańdardy tsıfrlandyrýdy qamtıdy.
Sonymen qatar taýarlardy tańbalaý jáne qadaǵalaýdyń ashyq júıesin qurý, memlekettik aqparattyq júıelerdi ıntegratsııalaý, franchaızıng pen kooperatsııany damytý, elektrondyq saýda týraly jeke zań qabyldaý, rıteıl formattaryn - saýda jelilerinen bastap strıt-rıteılge deıin jańǵyrtý josparlanyp otyr.
Otandyq óndiristi qoldaý jáne eksportty arttyrý saıasaty «satyp al-sat» modelinen «óndir-sat» modeline kóshýdi kózdeıdi. Bul ishki naryqtaǵy otandyq taýarlardyń úlesin arttyryp, óńdelgen ónim eksportyn ósirýge múmkindik bermek.
Osy maqsatta memleket tarıftik jáne tarıftik emes sharalardy keńeıtedi, sondaı-aq joǵary qosylǵan qundy ónim eksporttaýshylaryn qoldaýdy kúsheıtedi.
Tutynýshylardyń quqyqtaryn qorǵaýdy nyǵaıtý úshin taýarlar men kórsetiletin qyzmetterdiń sapasyn baqylaý tetikterin jetildirý, normalaý men sertıfıkattaýdy kúsheıtý, sondaı-aq tutynýshylardyń quqyqtaryn qorǵaý týraly zańnamaǵa túzetýler engizý josparlanyp jatyr.
Tujyrymdamada naqty maqsatty kórsetkishter kózdelgen:
- saýdadaǵy naqty kólem ındeksiniń ósimi - 2025 jylǵy 107%-dan 2030 jylǵa qaraı 110,2%-ǵa deıin;
- eńbek ónimdiliginiń artýy - 121,9%-dan 171%-ǵa deıin;
- negizgi kapıtalǵa salynatyn ınvestıtsııalardyń ósýi - 1,22 trln teńgeden 2,7 trln teńgege deıin;
- saýda salasyndaǵy kóleńkeli ekonomıkanyń úlesin tómendetý - 3,02%-dan 2,42%-ǵa deıin;
- bırjalyq saýdanyń úlesin ulǵaıtý - qazirgi 10%-dan 27%-ǵa deıin;
- elektrondyq saýda úlesiniń ósýi - 15%-dan 20%-ǵa deıin;
- saýdanyń zamanaýı formattarynyń úlesin arttyrý - 44%-dan 72%-ǵa deıin;
- óńdelgen ónimniń eksportyn ulǵaıtý - 41 mlrd AQSh dollarynan 52 mlrd dollarǵa deıin;
- tutynýshylardyń quqyqtaryn qorǵaý salasyndaǵy retteýdiń tıimdiligin arttyrý - 74,7%-dan 80,7%-ǵa deıin;
- Qazaqstan etalondarynyń ólshemdik múmkindikterin keńeıtý - 3,4%-dan 14,5%-ǵa deıin.
Buǵan deıin Almatydaǵy birqatar iri saýda jelisi baǵany negizsiz ósirgeni úshin jaýapqa tartylǵanyn jazǵanbyz.
Sonymen qatar QR Premer-Mınıstri Oljas Bektenov mınıstrlikke Shyńjań-Uıǵyr avtonomııalyq aýdanynda saýda ókildigin ashýǵa tolyq ázirlikti qamtamasyz etýdi tapsyrǵan edi.