Úkimet Qazaqstan bir ýaqyt beldeýinde bolýy qajet dep sanaıdy — Qasym-Jomart Toqaev

ASTANA. KAZINFORM — Memleket basshysy Qasym-Jomart Toqaev «Ana tili» gazetine bergen suhbatynda biryńǵaı ýaqyt beldeýine qatysty suraqqa pikir bildirdi.

— Qoǵamda biryńǵaı ýaqyt beldeýi týraly túrli pikir bar. Parlament pen Úkimettiń arasynda osyǵan qatysty pikirtalas júrip jatqanyn da bilemiz. Bul jóninde ne aıtar edińiz?

— Árıne, men jaǵdaıdy kórip-bilip otyrmyn. Úkimet óz sheshiminiń oryndy ekenine senimdi jáne Qazaqstan bir ýaqyt beldeýinde bolýy qajet dep sanaıdy. Ýaqytty durys paıdalaný týraly Barselona deklaratsııasynda ártúrli ýaqyt beldeýin engizýge, ony qysqy jáne jazǵy ýaqytqa aýystyrýǵa áýes bolmaý qajettigi aıtylǵan. Degenmen azamattarymyz ótinish bildirip jatyr. Úkimettiń sheshimine qatysty ashyq talqylaýlar jandana tústi. Menińshe, qoǵamda kózqaras qaıshylyǵyn týdyratyn mundaı máselelerdi muqııat talqylaý qajet. Sondyqtan Parlamentte ǵalymdardyń, sarapshylardyń jáne aımaq ókilderiniń qatysýymen qoǵamdyq tyńdaý ótti. Taraptar ýaqyt beldeýin aýystyrýdyń el ekonomıkasyna jáne azamattardyń turmysyna áseri jónindegi barlyq pikirdi eskere otyryp, 1 naýryzǵa deıin jan-jaqty zertteý júrgizýge ýaǵdalasty. Sodan keıin naqty usynystar ázirlenedi. Parlament pen Úkimet bul máseleni baıyppen zerdelep, ortaq ári durys sheshimge keletinine senimdimin.