Úkimet «Qazaqstan balalary» tujyrymdamasyn pysyqtaıdy
ASTANA. KAZINFORM – Búgin Úkimet otyrysy ótip, Mınıstrler kabınetiniń músheleri týrızmdi damytý máselelerin qarap, 2026-2030 jyldarǵa arnalǵan «Qazaqstan balalary» tujyrymdamasyn pysyqtaıdy.
Otyrys qorytyndysynda baspasóz máslıhaty ótedi. Onda Týrızm jáne sport mınıstri Erbol Myrzabosynov pen Oqý-aǵartý mınıstri Juldyz Súleımenova BAQ ókilderiniń saýaldaryna jaýap beredi.
Aıta keteıik, Týrızm jáne sport mınıstrligi 2026 jylǵa arnalǵan mádenı-týrıstik oqıǵalar kúntizbesin daıyndady. Qujatta elimizdiń 20 óńirinde ótetin 55 iri is-shara qamtylǵan.
Kúntizbe ishki týrızmdi nasıhattaýǵa, týrıstik baǵyttardy keńeıtýge jáne óńirlik brendterdi damytýǵa baǵyttalǵan. Іs-sharaǵa mádenı, etnomádenı, sporttyq, gastronomııalyq jáne ekologııalyq baǵyttaǵy túrli oqıǵalar engizilgen. Bul týrısterge jeke qyzyǵýshylyqtary men maýsymdyq erekshelikterin eskere otyryp, sapar baǵyttaryn aldyn ala josparlaýǵa múmkindik beredi.
Josparlanǵan bastamalardyń basym bóligi jyl saıyn dástúrli túrde ótkiziledi. Mundaı is-sharalar óńirlerge degen qyzyǵýshylyqty qalyptastyryp, oqıǵalar kún tártibiniń sabaqtastyǵyn qamtamasyz etedi. Sonymen qatar jobalardyń kópshiligi bıznes ókilderiniń qatysýymen nemese demeýshiligimen uıymdastyrylady. Bul oqıǵaly týrızmdi bıýdjetke qosymsha salmaq túsirmeı damytý qaǵıdatyna saı keledi.
2026-2030 jyldarǵa arnalǵan «Qazaqstan balalary» biryńǵaı baǵdarlamasynyń tujyrymdamasyn Oqý-aǵartý mınıstrligi Balalar quqyqtary jónindegi ýákilmen, Parlament depýtattary jáne azamattyq qoǵam ókilderimen birlese otyryp ázirledi. Atalǵan qujat Qazaqstandaǵy balalardyń quqyqtary men ál-aýqatyn qamtamasyz etýge baǵyttalǵan qoldanystaǵy jáne josparlanǵan barlyq sharany biriktirýge baǵyttalǵan ári óskeleń urpaqtyń múddesi úshin júıeli, turaqty ári dáıekti saıasat qurýdaǵy mańyzdy qadam bolmaq.
Baǵdarlama Qazaqstandaǵy árbir balanyń quqyǵy men ál-aýqatyn júıeli qorǵaýdy qamtamasyz etetin turaqty memlekettik saıasattyń negizine aınalýy tıis.
Esterińizge sala ketsek, ótken aptadaǵy Úkimet otyrysy Memleket basshysynyń Qyzylorda qalasynda ótken Ulttyq quryltaıda bergen tapsyrmalaryn oryndaý máselesi talqylandy. Jıyn barysynda Premer-mınıstrdiń orynbasary — Ulttyq ekonomıka mınıstri Serik Jumanǵarın Úkimet Ulttyq bankpen, Qarjy naryǵyn retteý jáne damytý agenttigimen Makroekonomıkalyq turaqtandyrý jáne halyqtyń ál aýqatyn arttyrý jónindegi 2026-2028 jyldarǵa arnalǵan birlesken is-qımyl baǵdarlamasyn iske asyrýdy jalǵastyratynyn aıtty. Negizgi basymdyq — halyqtyń tabysyn arttyrý bolmaq.
— Bıyl halyqtyń naqty tabysynyń ósýi 2,3% joǵary bolýy tıis. Oǵan ekonomıkanyń turaqty, sapaly ósýin qamtamasyz etý jáne ınflıatsııany tómendetý esebinen qol jetkiziledi. Ekonomıkanyń ósýi 5%-dan kem emes deńgeıde qamtamasyz etiledi. Ol úshin negizgi kapıtalǵa salynǵan ınvestıtsııalar kólemi jalpy ishki ónimge qatysty 18%-ǵa deıin jetkiziledi, — dedi vıtse-premer.
Sondaı-aq ol EAEO naryǵyndaǵy kedergilerdi anyqtaý jáne joıý jumystaryna basymdyq beriletinin aıtty.
– Eýrazııalyq ekonomıkalyq odaq aıasynda bıylǵy jáne keıingi jyldarǵa arnalǵan jumystyń negizgi baǵdarlary – Memleket basshysy qoıǵan basymdyqtar men mindetterdi praktıkalyq iske asyrý, onyń ishinde EAEO jalpy naryǵynda qazaqstandyq taýarlardy ilgeriletý jolyndaǵy kedergilerdi anyqtaý jáne joıý, – dedi Serik Jumanǵarın.
Al Premer-mınıstrdiń orynbasary - Mádenıet jáne aqparat mınıstri Aıda Balaeva jeke menshik mektepterdiń jumysy qalaı rettelip jatqanyn aıtty.
— Mindetti áleýmettik medıtsınalyq saqtandyrý júıesi Qarjy mınıstrligine berildi. Qazir quqyq qorǵaý organdarymen birlesip «Zań jáne tártip» qaǵıdatyna sáıkes tekserý júrip jatyr. Sonymen qatar, jeke medıtsına jáne bilim berý uıymdaryn qarjylandyrý mehanızmderin qaıta qaraý boıynsha is-sharalar jospary bekitildi. Osy sharalardy iske asyrý arqyly ashyq ári nátıjege baǵdarlanǵan júıe qalyptasady. Jalpy biz densaýlyq saqtaý jáne bilim berý salasynda kórsetiletin qyzmetterdiń sapasyna qatań baqylaý ornatýǵa tıispiz. Óıtkeni halyqtyń ómir súrý sapasy atalǵan máselelerge tikeleı baılanysty, — dedi Aıda Balaeva.
Osy oraıda Úkimet basshysy Oljas Bektenov Oqý-aǵartý mınıstrligine óńir ákimdikterimen birlesip, jańadan ashylatyn jeke menshik mektepterde memlekettik tapsyrysty ornalastyrýǵa moratorıı engizýdi tapsyrdy.
- Memlekettik qarjylandyrýmen óńirlerdiń oqýshy oryndaryna degen shuǵyl qajettiligin jabatyn jekemenshik mektepter ǵana qamtamasyz etilgeni jón. Qymbat elıtalyq mektepterdi qarjylandyrýdy toqtatý kerek, — dedi ol.
Munan bólek, Premer-mınıstr Medıtsınalyq saqtandyrý qorynyń aqparattyq júıesin 1 shildege deıin Densaýlyq saqtaý mınıstrliginiń júıesine ıntegratsııalaýdy tapsyrdy.
- Memleket basshysy Áleýmettik medıtsınalyq saqtandyrý qoryn Qarjy mınıstrliginiń qaramaǵyna berý týraly Úkimettiń sheshimin qoldady. Tıisti tekserýler bastalyp ketti. Kináli adamdar jaýapqa tartylady. Medıtsınalyq saqtandyrý qorynyń aqparattyq júıesi osy jyldyń 1 shildesine deıin Densaýlyq saqtaý mınıstrliginiń júıesine ıntegratsııalanýǵa tıis. Bul qarajatty paıdalanýdyń ashyqtyǵy men tıimdiligin qamtamasyz etedi, - dedi ol.
Sý resýrstary jáne ırrıgatsııa mınıstri Nurjan Nurjigitov sý dıplomatııasy men Syrdarııa ózenindegi sý qoımalarynyń kelisilgen jumys rejıminiń arqasynda sońǵy sý az jyldary da Soltústik Aral teńizine turaqty sý kelip otyrǵanyna toqtaldy.
– Soltústik Aral teńizin saqtaý jobasynyń ekinshi kezeńin ázirleý aıaqtalyp qaldy. Bul Kókaral bógetin qaıta qurýdy jáne teńiz deńgeıin Baltyq júıesi boıynsha 44 metrge deıin kóterýdi kózdeıdi. Nátıjesinde Soltústik Araldyń aýdany 3 913 sharshy shaqyrymǵa, al kólemi 34 mlrd tekshe metrge deıin artady. Teńizdi osy belgilerge deıin toltyrý úshin 4-5 jyl qajet, – dedi mınıstr.
Óz kezeginde Úkimet basshysy Sý resýrstary jáne ırrıgatsııa mınıstrligine Soltústik Aral jobasynyń ekinshi kezeńine syrttan qarajat tabýdy júktedi.
— Aral teńiziniń máselesi Memleket basshysynyń turaqty nazarynda. Sý resýrstary mınıstrligi osy jyldyń 30-shy maýsymyna deıin Soltústik Aral teńizin saqtaýdyń ekinshi kezeńin daıyndaýdy aıaqtap, jyl sońyna deıin qarjylandyrý máselesin, onyń ishinde halyqaralyq uıymdar esebinen qarjylandyrýdy sheshýi qajet. Memleket basshysynyń Birikken Ulttar Uıymynyń alańynda Halyqaralyq sý uıymyn qurýǵa qatysty bastamasyn odan ári ilgeriletý jóninde sharalar qabyldaý qajet. Sý resýrstary mınıstrligi Energetıka mınıstrligimen birlesip, bıyl Qazaqstannyń sý-energetıkalyq resýrstary kartasyn ázirlesin, — dedi Oljas Bektenov.
Al Energetıka mınıstri Erlan Aqkenjenov jalpy qýaty 960 MVt bolatyn Kókshetaý, Semeı jáne Óskemen qalalaryndaǵy 3 jylý elektr ortalyqtary jobalarynyń aıaqtalý merzimderi ózgermeıtinin jáne olardyń iske asyrylýy mınıstrliktiń tolyq baqylaýynda ekenin atap ótti.
Osy rette Premer-mınıstr Oljas Bektenov «Samuryq-Qazyna» qorynyń basshylyǵyna birneshe tapsyrma berdi.
— Memleket basshysy kómir generatsııasyn damytýdyń jáne jańa jylý elektr ortalyqtary jobalaryn iske asyrýdyń mańyzdylyǵyn atap ótti. Osyǵan baılanysty «Samuryq-Qazyna» qoryna qańtar aıynyń sońyna deıin Kókshetaý, Semeı jáne Óskemen qalalarynda jylý elektr ortalyqtaryn salý jobalaryn iske asyrý boıynsha kelisimsharttardy bekitýdi tapsyramyn. Qurylys jumystaryna aldymyzdaǵy sáýir aıynda kirisý kerek, — dedi ol.