Úkimet yntalandyrý tásiline kóshti – Batalov salyq reformasy jaıly

ASTANA. Kazinform – «Atameken» UKP basqarma tóraǵasy Raıymbek Batalov qosylǵan qun salyǵy mólsherlemesin kóterý bastamasyn qoldaıtynyn aıtty, dep habarlaıdy Kazinform tilshisi.

Onyń aıtýynsha, bıznes úshin eńbek aqysyn tóleý qorynyń júktemesi – mańyzdy taqyryp.

Bastamada kásipkerlerdi áleýmettik salyqtar men jumys berýshiniń mindetti zeınetaqy jarnalarynan bosatyp, onyń ótemi retinde qosylǵan qun salyǵy mólsherlemesin kóterý aıtylǵan. 

— Biz qazynany toltyryp, bıznesti «kóleńkeden» shyǵarý keregin qoldaıtynymyzdy taǵy da aıtamyz. Biraq bundaı isti yntalandyrý arqyly júzege asyrý kerek dep sanaımyz. Bul oraıda Úkimettiń de «eńbek aqysyna salyqty tómendetý» arqyly osy tásildi qoldanǵaly otyrǵanyn kóremiz. Bıznes úshin bul ájeptáýir salyq. Ol ózindik qundy qalyptastyrýda mańyzdy ról atqarady. Ony tómendetý oń áser beredi, - deıdi UKP basqarma tóraǵasy. 

Raıymbek Batalov qosylǵan qun salyǵyn kóterý taýar men qyzmet baǵasynyń joǵarylaýyna yqpal etetinin joqqa shyǵarmaıdy. Deıturǵanmen, jańa mólsherleme 16-20 paıyz aralyǵynda qarastyrylyp otyrǵanyn, al qazirgi mólsherleme 12% ekenin aıtady. 

— QQS qansha paıyz kóterilse, taýar men qyzmet baǵasy sonsha kóteriledi. Ekinshi jaǵynan QQS ádistemesin de qaıta qaraý kerektigin aıtyp otyrmyz. Sondyqtan biz óz tarapymyzdan shaǵyn jáne orta bızneske túsetin júktemeni túrli tásilder arqyly jeńildetýdi usynamyz. Belgili bir yntalandyrý sharalary jasalsyn, naqty jobalar arqyly ınfraqurylym jaǵdaıy jaqsartylsyn degendeı, - dedi «Atameken» UKP basqarma tóraǵasy. 

Odan bólek, ol Memleket basshysy Úkimettiń keńeıtilgen otyrysynda aıtqan bankterdiń ekonomıkanyń naqty sektorlaryn damytýǵa qatysýy týraly bastamasyna qatysty pikirin aıtty. 

— Prezıdent ádil joldy aıtty. Bankter qıyn kezge tap bolǵanda, memleket kómektesti. Al qazir bankterdiń tabysy artty ǵoı. Olar ózderinde kezinde kómekke dep berilgen qarjyny ustap qalyp otyr. Prezıdent ekonomıkany, shaǵyn jáne orta bıznesti qarjylandyrýda qandaı kedergiler baryn atap kórsetti. Bul kepil, garantııa, kepildendirý qoryna qatysty máseleler. Memleket basshysy osy máselelerdi sheshý boıynsha Ulttyq bankke tapsyrma berdi, - dedi ol. 

Aıta ketsek, keshe QR Premer-Mınıstri Oljas Bektenov qazirgi salyq júıesi memleketke qajetti ınvestıtsııa kólemin qamtamasyz ete almaı otyrǵanyn, salyq-bıýdjet júıesin saýyqtyrý úshin keshendi sharalardy júzege asyrý kerektigin aıtqan bolatyn.

Keıin QR Premer-Mınıstriniń birinshi orynbasary Serik Jumanǵarın QQS shegin kóterý qajettigin túsindirdi.

Memleket basshysy bul reformany maquldaǵanyn aıtty.