Úkimet ınflıatsııany tejeý boıynsha keshendi is-sharalar ázirledi

ASTANA. KAZINFORM — Úkimet ınflıatsııany tejeý boıynsha keshendi is-sharalar ázirledi. Bul týraly Parlament palatalarynyń birlesken otyrysynda Ulttyq bank tóraǵasy Tımýr Súleımenov aıtty.

— Memleket basshysy ınflıatsııany tejeý boıynsha keshendi is-sharalar ázirleýdi tapsyrǵan edi. Bul tapsyrma Úkimet pen Ulttyq bankke berildi. Bazalyq qujat daıyn. Taıaý ýaqytta ony Úkimettiń ishinde qarastyramyz dep úmittenemin. Sodan keıin jarııa etiledi. Bul barynsha mańyzdy másele. Biz ınflıatsııany tómendetý máselesin sheshý úshin barlyq kúsh-jigerimizdi jumsaımyz, — dedi Tımýr Súleımenov depýtattardyń saýalyna oraı.

Onyń atap ótýinshe, Reseı — Qazaqstannyń negizgi saýda seriktesteriniń biri. Bul elden keletin ımporttyń kólemi 30 paıyzdan asady. 

— Azyq-túliktiń 45 paıyzyn Reseıden ımporttap otyrmyz. Sondyqtan ol jaqtyń ekonomıkasyna, baǵa parametrlerine qaramasaq bolmaıdy. Al ol jaqta ne bolyp jatyr? Inflıatsııasy shamamen 10 paıyz. Buǵan qosa rýbl baǵasy jyl basynan beri dollarǵa, eýro men teńgege qarsy 30 paıyz shamasynda kúsheıdi. Demek, taýar baǵasy qymbattaı tústi, — dedi ol.

Aıta keteıik, Úkimet úıinde Parlament palatalarynyń birlesken otyrysy ótip jatyr.