Úkimet ınflıatsııamen qalaı kúrespek – keńeıtilgen keńes
ASTANA. KAZINFORM - Vıtse-premer Serik Jumanǵarın senbi kúni ınflıatsııa máseleleri boıynsha keńeıtilgen keńes ótkizdi, dep habarlaıdy Úkimettiń baspasóz qyzmeti.
Úkimettiń bıylǵy negizgi mindeti – 8%-dan aspaıtyn ınflıatsııa dálizine kirý. 10 aıdaǵy derekterdi jáne ınflıatsııa ındeksiniń negizgi quramdas bólikteri – aqyly qyzmetter, azyq-túlik jáne azyq-túlik emes taýarlar boıynsha baǵa jaǵdaıyn damytý perspektıvalaryn eskere otyryp, Úkimet jyldyq ınflıatsııany tejeý úshin yqtımal sharalardy qarastyrdy.
Ulttyq statıstıka bıýrosynyń málimeti boıynsha, qazan aıynda ınflıatsııanyń jalpy jyldyq ósý qarqyny 8,5% bolǵan kezde eń kóp úlesti aqyly qyzmet kórsetý qosty – 14,3%. Bul ındekstiń ósýi Qazaqstanda 2023 jyly «Tarıfti ınvestıtsııaǵa aıyrbastaý» memlekettik baǵdarlamasynyń bastalýyna baılanysty, ol boıynsha elektr, jylý jáne sýmen jabdyqtaý jáne sý burý ınjenerlik jelilerin jańǵyrtý úshin aýqymdy salymdar tartylýda. Investıtsııalarǵa aıyrbastaý úshin baǵdarlama boıynsha tarıfterdiń jyl saıynǵy belgili bir ósýi kózdeledi. Keńeste atap ótilgendeı, osy baǵdarlama boıynsha 2024 jylǵa josparlanǵan kommýnaldyq qyzmetterge tarıfterdiń negizgi ósýi júrgizildi jáne jyl sońyna deıin qosymsha ósý kútilmeıdi.
Azyq-túlik emes taýarlardyń ishinde negizgi ósim (2023 jylǵy qazanda 7,8%-ǵa ósim) kıim, aıaq kıim, aýdıovızýaldy jabdyqtar, dári-dármek jáne basqa da taýarlarda tirkeldi. Azyq-túlik taýarlary boıynsha jylyna 4,9% tómen ósý qarqynymen áleýmettik mańyzy bar ónimder boıynsha deflıatsııa baıqalady (-0,2%). Jıynda aýyl sharýashylyǵy vıtse-mınıstri Erbol Tasjúrekov qysqy jáne maýsymaralyq kezeńde baǵany turaqtandyrý úshin jańa eginniń qalyptasqan azyq-túlik qorynyń jaı-kúıi týraly habardar etti. Aýyl sharýashylyǵy qoımalarynda, saýda oryndarynda, aýyl sharýashylyǵy taýar óndirýshilerinde saqtalǵan negizgi azyq-túliktiń 29 túri boıynsha 826 myń tonnadan astam qor bar. Túrli saqtaý merzimderin eskere otyryp, turaqtandyrý qorlaryndaǵy taýarlar únemi tolyqtyrylyp otyrady jáne elimizdiń birneshe aıdaǵy jekelegen ónimderge degen qajettiligin qanaǵattandyrýǵa jetkilikti.
Aldaǵy jańa jyldyq merekelerdi eskere otyryp, azyq-túlik baǵasynyń qymbattaý úrdisine tosqaýyl qoıý maqsatynda Serik Jumanǵarın oblystar men respýblıkalyq mańyzy bar úsh qalada turaqty túrde aýyl sharýashylyǵy jármeńkelerin uıymdastyrý arqyly sórelerdiń qoljetimdi ónimmen toltyrylýyn qamtamasyz etýdi tapsyrdy. Al eń iri megapolıs – Almatyda qalaǵa bekitilgen aýylsharýashylyq aımaqtarynan ónimderdi úzdiksiz jetkizýdiń arqasynda júzege asýy tıis. Sondaı-aq Premer-mınıstrdiń orynbasary qysqy jáne kóktemgi maýsymaralyq kezeńde baǵany odan ári turaqtandyrý maqsatynda aqpan aıynyń basynan bastap jınalǵan kókónis qoryn brondaýdy bastaý mindetin qoıdy.
Azyq-túlik emes taýarlar baǵasyn turaqtandyrý úshin vıtse-premer Ulttyq ekonomıka mınıstrligine atalǵan ındekstiń quramdas bólikterine taldaý júrgizýdi jáne olardyń ósý qarqynyn tejeý boıynsha usynystar daıyndaýdy tapsyrdy. Inflıatsııany aýyzdyqtaý jónindegi kelesi keńes eki aptadan keıin ótedi dep josparlanýda.
Osyǵan deıin Ulttyq bank 2025 jyly ınflıatsııa tómendeı me, degen saýalǵan boljamyn usynǵan bolatyn.
