Úkimet hımııa ónerkásibindegi ınvestıtsııalyq jobalardy súıemeldeýdi kúsheıtedi
ASTANA. KAZINFORM – Nurlybek Nálibaev Jambyl oblysyndaǵy iri ınvestıtsııalyq jáne ınfraqurylymdyq jobalardy júzege asyrý barysymen tanysty. Bul týraly Úkimettiń baspasóz qyzmeti habarlady.
Premer-mınıstrdiń birinshi orynbasary Nurlybek Nálibaev Jambyl oblysyna jumys sapary aıasynda hımııa ónerkásibindegi iri ınvestıtsııalyq jobalardyń júzege asyrylý barysymen tanysty. Óńir basshysy Erbol Qarashókeevpen birge jumys istep turǵan kásiporyndardy, salynyp jatqan óndiris oryndaryn aralady.
Prezıdent Qasym-Jomart Toqaevtyń jańa ekonomıkalyq modelge kóshý boıynsha qoıǵan mindetterin júzege asyrý úshin energetıkalyq, ınjenerlik jáne kólik-logıstıkalyq ınfraqurylymdy keshendi túrde damytýǵa erekshe nazar aýdarylady. Bul baǵyt — Úkimet jumysyndaǵy basty baǵyttardyń biri.
Jumys sapary elimizdegi hımııa ónerkásibiniń jetekshi kásiporyndarynyń biri — «Qazfosfat» JShS-dan bastaldy. Kásiporyn 2026 jyldyń qańtar-sáýir aılarynda 64,2 mlrd teńgeniń 246,1 myń tonna ónimin óndirgen.
«Qazaqmys Holdıng» JShS dırektorlar keńesiniń tóraǵasy Edýard Ogaıdyń aıtýynsha, «Qazfosfat» JShS mıneraldy tyńaıtqyshtarmen otandyq agroónerkásip keshenin qamtamasyz etip qana qoımaıdy, Reseı, Belarýs, Túrikmenstan, Lıtva, Latvııa, Polsha jáne basqa da elderdiń naryǵyna eksporttaıdy.
Úkimet basshysynyń birinshi orynbasary Sarysý aýdanyndaǵy Qazaq Soda kaltsıılendirilgen soda zaýytynyń qurylysy mysalynda ónerkásip salasyndaǵy ınvestıtsııalyq yntymaqtastyqtyń jańa baǵyttarymen de tanysty.
Jobanyń birinshi kezeńinde zaýyttyń óndiristik qýaty jylyna 500 myń tonnaǵa jetse, keıin 1 mln tonnaǵa deıin ulǵaıtylady. Qurylys kezinde 1 500 ýaqytsha jumys orny ashylyp, iske qosylǵannan keıin 375 adam turaqty jumyspen qamtylady. Zaýyt Qazaqstannyń kaltsıılendirilgen sodaǵa degen ishki suranysyn tolyq qamtamasyz etedi.
Birinshi kezeńdi 2026 jyldyń tórtinshi toqsanynda aıaqtaý josparlanǵan. YILDIRIM Holding kompanııasynyń atqarýshy dırektory Ismaıl Djeılan memlekettik qoldaý aıasynda óndiristik alańǵa gaz jáne elektrmen jabdyqtaý jelileri, temirjol tarmaǵy men sý júıesi tartylyp jatqanyn jetkizdi.
Jumys sapary Sarysý aýdanyndaǵy jalpy quny 500 mlrd teńgeni quraıtyn, elimizdiń hımııa salasyndaǵy eń iri ınvestıtsııalyq jobalardyń biri júzege asyrylyp jatqan «EýroHım-Qarataý» JShS-da jalǵasty.
Munda alǵashqy kezeńde jylyna 800 myń tonna kúkirt qyshqylyn óndirý jolǵa qoıylǵan. Ekinshi kezeńde jylyna 1 mln tonnaǵa deıin mıneraldy tyńaıtqysh shyǵaratyn óndiristi iske qosý kózdelgen jáne ony aıaqtaý 2027 jyldyń birinshi toqsanyna josparlanǵan. Kásiporyn tolyq óndiristik qýatyna shyqqan kezde 1 200 turaqty jumys orny ashylady. Al qurylys kezeńinde munda 2 myńǵa deıin adam eńbek etýde.
Nysandardy aralaǵan soń memlekettik qoldaý men ınvestıtsııa tartý naqty ekonomıkalyq nátıjege ulasýy tıis ekeni atap ótildi. Bul — jańa óndiristerdi iske qosý, turaqty jumys oryndaryn ashý, eksporttyq áleýetti keńeıtý jáne eldiń ónerkásiptik negizin nyǵaıtý. Osy oraıda jaýapty memlekettik organdar men Jambyl oblysynyń ákimdigine ınvestıtsııalyq jobalardy turaqty súıemeldeý, týyndaıtyn máselelerdi jedel sheshý tapsyryldy.
Odan ári qaraı turǵyn úı qurylysy, energetıka jáne kólik ınfraqurylymy salalaryndaǵy jobalardyń oryndalý barysyn tekserdi.
Taraz qalasyndaǵy «Balaýsa» jańa shaǵyn aýdanynda 145 turǵyn úı, eki mektep, úsh balabaqsha, onkologııalyq dıspanser, kópbeıindi aýrýhana, lıtseı-ınternat, neke saraıy, ınnovatsııalyq shyǵarmashylyq ortalyq jáne dene shynyqtyrý-saýyqtyrý keshenin salý kózdelgen.
Jańa shaǵyn aýdan biryńǵaı sáýlettik tujyrymdama negizinde salynyp, zamanaýı turǵyn úılermen qatar, qajetti ınjenerlik ınfraqurylymmen tolyq qamtamasyz etiledi.
Aldaǵy jylytý maýsymyna daıyndyqqa erekshe nazar aýdaryldy. «TarazEnergoOrtalyq» AQ-nyń № 4 jylý elektr ortalyǵyndaǵy (JEO-4) jóndeý, jabdyqtardy, 1,4 shaqyrymdyq M-3 magıstraldyq jylý jelisin qaıta jańǵyrtý jumystarynyń barysyn kórdi.
Sonymen qatar Abaı dańǵylynyń temirjol ústinen ótetin jol jáne jaıaý júrginshiler ótkeli qarastyrylǵan jańa ýchaskesi qurylysymen, Taraz temirjol vokzalyn qaıta jańǵyrtý jumystarymen tanysty. Barlyq joba belgilengen merzimde ári sapa talaptaryna saı aıaqtalýy tıis ekenin atap ótti. Jaýapty memlekettik jáne jergilikti atqarýshy organdarǵa energetıka nysandaryn jylytý maýsymyna sapaly daıyndaýǵa, jylýmen qamtý júıesiniń senimdiligin qamtamasyz etýge jáne áleýmettik mańyzy bar ınfraqurylymdyq jobalardyń qurylysyn ýaqytyly aıaqtaýǵa erekshe nazar aýdarý tapsyryldy.
Aıta ketelik Alataý qalasynda jańa basqarý organdary qurylatyny týraly jazǵan edik.
