Úkimet «Halyq býhgalteri» aktsııasynyń alǵashqy nátıjelerin jarııalady
ASTANA.KAZINFORM - QR Úkimetiniń, atap aıtqanda Qarjy mınıstrliginiń tarapynan kásipkerlerge qoldaý kórsetý, býhgalterlik jáne salyq eseptiliginiń sapasyn arttyrýǵa baǵyttalǵan birshama jumys atqarylyp keledi, dep habarlaıdy Úkimettiń baspasóz qyzmeti.
Bıyl 5 qańtardan bastap «Halyq býhgalteri» respýblıkalyq aktsııasy qolǵa alynǵan bolatyn. Atalǵan bastamany Qarjy mınıstrligi býhgalterlerdiń kásibı uıymdarymen birge júzege asyrǵan, bul jumys salyq tóleýshilerge praktıkalyq kómek kórsetýdi kózdeıdi.
Konsýltatsııalyq keńester oblys ortalyqtarynda, sondaı-aq Astana, Almaty jáne Shymkent qalalarynda memlekettik kirister basqarmalarynyń bazasynda oflaın-qabyldaý formatynda tegin ótkizilip jatyr. Aktsııa 2026 jyldyń 30 maýsymyna deıin jalǵasady.
Qańtar-aqpan aılarynda keńes aptasyna úsh ret uıymdastyrylady – dúısenbi, sársenbi jáne juma kúnderi saǵat: 10.00-den 13.00-ge deıin.
Al naýryz aıynan bastap qabyldaý aptasyna eki ret ótkiziledi. Konsýltatsııalyq pýnktterdiń jumys kestesi men mekenjaılary Memlekettik kirister komıtetiniń, MKD men basqarmalardyń resmı ınternet-resýrstarynda jáne áleýmettik jelilerdegi akkaýnttarynda jarııalanǵan. Qabyldaý oryndarynda «Halyq býhgalteri» belgileri kórsetilgen.
Aktsııaǵa memlekettik kirister organdarynyń qyzmetkerleri, sondaı-aq 120-dan astam akkredıttelgen kásibı býhgalter tartylǵanyn atap ótken jón.
Osy bastama bastalǵaly beri 17,5 myń salyq tóleýshi keńes alyp, 160-tan astam suhbat júrgizildi. Betpe-bet júzdesý formatyndaǵy jumys óz tıimdiligin kórsetti: salyq tóleýshilerge býhgalterlik esep, salyq eseptiligi jáne aqparattyq júıelerdegi jumys máselelerine baılanysty praktıkalyq keńester berildi.
Aktsııa sheńberinde azamattarǵa birqatar baǵyt boıynsha konsýltatsııa usynylǵan:
● ońtaıly salyq rejımin tańdaý jáne ótpeli kezeń máseleleri boıynsha;
● arnaıy salyq rejımderindegi salyq jeńildikteri men shegerimder;
● elektrondy shot-faktýralardy jazyp berý;
● QQS shegi, QQS boıynsha esepten shyǵarý jáne qoıý;
● ózin-ózi jumyspen qamtyǵandar úshin ruqsat etilgen qyzmet túrleri;
● salyq mindettemelerin oryndaý tártibi jáne taǵy da basqalar.
- «Halyq býhgalteri» aktsııasy sátti jalǵasyp keledi. Joba túsinikti, qoljetimdi jáne adamǵa baǵdarlanǵan salyq ortasyn qalyptastyrýǵa arnalǵan keshendi jumys bolyp sanalady. Osy oraıda kásipkerler men azamattardy tegin kásibı keńes alyp, óz saýattylyǵyn arttyrýǵa shaqyramyz! - delingen habarlamada.
Aıta keteıik, elimizde 1 qańtarda salyqpen tikeleı jumys isteıtin mamandarǵa arnalǵan «Halyq býhgalteri» aktsııasy iske qosyldy. Salyqpen tikeleı jumys isteıtin mamandarǵa arnalǵan «Halyq býhgalteri» aktsııasyn Qarjy mınıstrligi kásipkerlerge kómektesý úshin júzege asyrmaq.