Úkimet gaz hımııasy salasyndaǵy halyqaralyq seriktestikti kúsheıtpek
ASTANA. KAZINFORM — Oljas Bektenov Air Products basshylyǵymen gaz hımııasy jáne ónerkásip tehnologııalary salasyndaǵy yntymaqtastyqty talqylady. Bul týraly Úkimettiń baspasóz qyzmeti habarlady.
Premer-mınıstr Oljas Bektenov Air Products kompanııasynyń (AQSh) Eýropa jáne Afrıka óńirleri boıynsha prezıdenti Ivo Bolspen kezdesý ótkizdi. Onda ónerkásiptik kooperatsııany damytý, ozyq tehnologııalardy engizý jáne gaz hımııasy salasyndaǵy birlesken ınvestıtsııalyq jobalardy júzege asyrý perspektıvalary talqylandy.
Air Products — gaz ındýstrııasynyń halyqaralyq kóshbasshysy, ol álemniń 50-den astam elinde jumys júrgizedi.
Kezdesý barysynda gaz hımııasy, kómir hımııasy, sýtegi energetıkasy salasyndaǵy yntymaqtastyqty damytýǵa, sondaı-aq otandyq metallýrgııa óndiristeriniń tıimdiligin arttyrýǵa erekshe nazar aýdaryldy.
Oljas Bektenov Qazaqstan jańa sapa ekonomıkasyna dáıekti túrde kóship kele jatqanyn, munda negizgi basymdyqtar tehnologııalyq jańǵyrtý, tehnologııalar transferi jáne zamanaýı óndirister qurý bolyp otyrǵanyn atap ótti.
— Biz jetekshi halyqaralyq kompanııalarmen seriktestikke úlken mán beremiz jáne ozyq tehnologııalardy damytý baǵytyndaǵy ózara tıimdi yntymaqtastyqqa árdaıym ashyqpyz. Qazaqstan aıtarlyqtaı resýrstyq áleýetke ıe jáne jańa ındýstrııalyq salalardy qalyptastyrý boıynsha júıeli jumys júrgizilip keledi, — dep atap ótti Oljas Bektenov.
Air Products kompanııasynyń Eýropa jáne Afrıka óńirleri boıynsha prezıdenti Ivo Bols Qazaqstanmen áriptestikti keńeıtýge jáne ekonomıkanyń basym sektorlarynda birlesken bastamalardy júzege asyrýǵa qyzyǵýshylyq tanytty.
Kezdesý qorytyndysy boıynsha Premer-mınıstr «Samuryq-Qazyna» UÁQ» AQ basqarma tóraǵasyna Air Products kompanııasymen keleshegi zor birlesken jobalardyń naqty pysyqtalýyn jandandyrýdy tapsyrdy.
Aıta ketelik elde AEA-lardy damytýdyń jańa modeli ázirlenip jatyr.
