Úkimet gallııge eksporttyq kedendik bajdy alyp tastady

ASTANA. KAZINFORM - Qazaqstan Respýblıkasy Premer-mınıstriniń orynbasary – ulttyq ekonomıka mınıstri Serik Jumanǵarınniń tóraǵalyǵymen syrtqy saýda saıasaty jáne halyqaralyq ekonomıkalyq uıymdarǵa qatysý máseleleri jónindegi vedomstvoaralyq komıssııanyń otyrysy ótti.

Bul týraly Úkimettiń resmı saıtynan málim boldy. 

Otyrysta gallııge qoldanylatyn eksporttyq kedendik baj mólsherlemesin 10%-dan 0%-ǵa deıin tómendetý týraly sheshim qabyldandy. Bul shara Qazaqstanda gallıı óndirisin yntalandyrýǵa jáne eksport áleýetin damytýǵa baǵyttalǵan.

Sońǵy jyldary respýblıkada gallıı óndirilmegenine qaramastan, joǵary tehnologııalyq salalarda bul metallǵa degen jahandyq suranys turaqty bolyp tur. Qazaqstanda atalǵan naryqqa shyǵýǵa múmkindik beretin jetkilikti resýrs bazasy bar, sol sebepti elimiz jahandyq jetkizý tizbeginde óz ornyn ala alady. Bul óz kezeginde eksporttyq belsendilikti arttyrýǵa, shetel valıýtasyndaǵy túsimderdi kóbeıtýge ári otandyq óndirýshilerdiń syrtqy naryqtaǵy úlesin keńeıtýge jaǵdaı jasaıdy.

Sonymen qatar vedomstvoaralyq komıssııa tústi metall qorytpalarynyń barlyq kólik túrimen QR aýmaǵynan shyǵarýǵa 2025 jylǵy 31 jeltoqsanǵa deıin tyıym salý týraly usynysty qoldady.

Tyıym óńdelmegen mys, alıýmınıı qorytpalary jáne qorǵasyn quımalaryna qatysty.

Bul shara ishki naryqty strategııalyq shıkizatpen qamtamasyz etýge, qosylǵan quny tómen ónimdi syrtqa shyǵarmaýǵa jáne tústi metaldardy el ishinde óńdeýdi yntalandyrýǵa baǵyttalǵan.

Osyǵan deıin Úkimette birinshi jartyjyldyqtaǵy ınflıatsııa qorytyndysy shyǵarylǵany týraly jazǵan edik.