Úkimet fermerlerdiń jol talǵamaıtyn bir kóligin salyqtan bosatý usynysyn talqylaıdy

ASTANA. KAZINFORM – Májilis depýtaty Erbolat Satybaldın aýyldaǵy fermerlerdiń jol talǵamaıtyn bir kóligin salyqtan bosatýdy usyndy.

- Qaralyp jatqan jańa Salyq kodeksiniń jobasyna sharýa qojalyqtaryna arnalǵan qozǵaltqysh kólemi 5,7 lıtrge deıingi bir jeńil avtokólikti salyqtan bosatý týraly usynys bergen edik. Bul usynys Úkimettiń qorytyndysyn alýǵa joldanǵan, biraq áli jaýap kelmedi. Osy jol talǵamaıtyn kólikter negizinen alys aýyldarǵa qatynaýǵa, batpaq kezinde nemese qysta qalyń qar túskende mal izdeýge kerek. Atap aıtqanda, qozǵaltqysh kólemi joǵary bul kólikterdi egin sharýashylyǵyna paıdalanýǵa tıimdi. Qazir paıdalanyp júrgenine 15 jylǵa jetip qalǵan osy avtokólikter óte sapaly. Jańadan shyǵyp jatqan kólikter osyndaı sapada emes, - dedi E.Satybaldın.

Onyń paıymynsha, fermerler arasynda qozǵaltqysh kólemi 5,7 lıtrge deıingi atalǵan eski kólikterge suranysy joǵary.

- Bul avtokólikterdi sán-saltanat múlki retinde qaraýǵa bolmaıdy. Ony aýyl sharýashylyǵyna paıdalanatyn negizgi quraldardyń biri retinde qarastyrǵan jón. Sondyqtan aýyl sharýashylyǵynda tirkelgen osy kólikterdiń bireýin salyqtan bosatýǵa qalaı qaraısyz? - dep surady depýtat.

Óz kezeginde Premer-mınıstrdiń orynbasary – Ulttyq ekonomıka mınıstri Serik Jumanǵarın bul usynysty pysyqtaýǵa bolatynyn aıtty.

- Bir kólikke qatysty qarastyryp kóreıik. Aýylda júrý úshin jol talǵamaıtyn kólik kerek. Ony durys usynys dep túsinýge bolady, biraq artyq ketpeıik. Erteń bireýlerin qoldap jatyr, al qaladaǵy bıznesmenderge jeńildik bermeı jatyr degen paıym bolýy yqtımal. Atap aıtqanda, jańaǵy usynysty talqylaıyq, - dedi S.Jumanǵarın.

Budan buryn habarlanǵandaı, Salyq kodeksiniń jańa redaktsııasynda QQS salynatyn aınalymnyń tómengi shegin 40 mln teńge dep belgileý usynylyp otyr.