Úkimet Eýrazııa aýmaǵyndaǵy saýda-sattyqtyń ádil jaǵdaıda jasalýyn naqty dálelmen talap etýge mindetti — Prezıdent
ASTANA. KAZINFORM — Eldegi azyq-túlik naryǵynyń ımportqa táýeldiligin barynsha azaıtý — Úkimettiń strategııalyq mindeti. Bul týraly Memleket basshysy Qasym-Jomart Toqaev Qazaqstan halqyna Joldaýynda aıtty.
— Qazirgi tańda eń ózekti mindettiń biri bul — agrohabtar jáne logıstıka ortalyqtaryn damytý. Atap aıtqanda, shetel ınvestorlarymen seriktestikti nyǵaıtý kerek. Biraq, bul jerde bir nárseni eskerý qajet: otandyq kásipkerler qazirgi zaman talabyn durys túsinbese, ıaǵnı jasandy ıntellektini qalaısha tıimdi paıdalanýǵa bolatynyn bilmese, tabysty bıznes seriktestigin qura almaıtyny anyq. Mınıstrlik mal sharýashylyǵy salasyndaǵy agrobıznesti qoldaý josparyn ázirlep, naqty qarjylandyrý sharalaryn bastaýy kerek. Basty maqsat — ishki naryqty etpen tolyq qamtamasyz etý. Sonymen qatar, osy salanyń eksporttyq áleýetin kúsheıtý, — dedi Prezıdent.
Memleket basshysynyń paıymynsha, eldegi azyq-túlik naryǵynyń ımportqa táýeldiligin barynsha azaıtý — Úkimettiń strategııalyq mindeti.
— Árıne, ózimizdi ózimiz júz paıyz qamtamasyz etýimiz múmkin emes, bálkim, onyń qajeti de joq shyǵar. Biraq, naryqtaǵy qazirgi jaǵdaıdy aıtýdyń ózi uıat. Buǵan qosa, dástúrli ulttyq ónimderimizdi syrtqy naryqqa belsendi túrde tanytý kerek. Sondyqtan agrarlyq eksporttyń naqty josparyn ázirleý qajet. Onda logıstıka, veterınarlyq jáne fıtosanıtarlyq standarttar men utymdy marketıng strategııasy eskerilýge tıis. Bul — Aýyl sharýashylyǵy mınıstrliginiń ǵana emes, birqatar memlekettik organnyń ortaq mindeti. Sondyqtan is-áreketterdi Úkimet basshylyǵy deńgeıinde úılestirip otyrý kerek. Úkimet Eýrazııa aýmaǵyndaǵy saýda-sattyqtyń ádil jaǵdaıda jasalýyn naqty dálelmen talap etýge mindetti. Al depýtattar zańnamalyq bastamalar arqyly otandyq ónim óndirýshilerdiń quqyqtaryn qorǵaýǵa tıis, — dedi Memleket basshysy.
Prezıdentttiń atap ótýinshe, Eýrazııa ekonomıka odaǵyna múshe basqa memleketterdiń kásiporyndarymen salystyrǵanda, bizdiń kásipkerlerimizdiń qajetti mólsherde memlekettik qoldaýǵa ıe bolmaı otyrǵany anyqtalǵan.
— Sol sebepti, olar tıimsiz jaǵdaılarǵa tap bolyp, ishki naryqtyń ózinde básekelesterine ese jiberip jatyr. Bul jerde sút óndirýshiler týraly sóz bolyp otyr, — dedi Qasym-Jomart Toqaev.
Sondaı-aq Memleket basshysy joǵary tehnologııaǵa 1 mlrd dollar ınvestıtsııa tartý týraly baǵdarlama ázirleý qajettigin aıtty.
Aıta keteıik, Joldaýdyń onlaın translıatsııasy Jibek Joly efırinde, sondaı-aq telearnanyń YouTube arnasynda júrip jatyr.
Kazinform saıty tikeleı efırmen qatar, jazbasha translıatsııa da jasaıdy.
Sondaı-aq Joldaý mátinin agenttiktiń telegram arnasynan oqýǵa bolady.