Úkimet esirtki qylmysymen kúresý úshin respýblıkalyq shtab qurdy

ASTANA. KAZINFORM – Úkimet Prezıdenttiń tapsyrmasy aıasynda nashaqorlyq profılaktıkasy jáne esirtki qylmysyna qarsy is qımyl boıynsha memlekettik organdardyń qyzmetin úılestirý jónindegi respýblıkalyq shtab qurdy. 

Prezıdent Qasym-Jomart Toqaevtyń Qaýipsizdik Keńesi otyrysynda bergen tapsyrmalaryn oryndaý sheńberinde Premer-mınıstrdiń ókimimen Nashaqorlyq profılaktıkasy jáne esirtki qylmysyna qarsy is qımyl boıynsha memlekettik organdardyń qyzmetin úılestirý jónindegi respýblıkalyq shtab quryldy. Oǵan Premer-mınıstr basshylyq etedi, basshynyń orynbasarlary retinde Premer-mınıstrdiń orynbasary jáne ishki ister mınıstri aıqyndaldy.

Shtabtyń negizgi mindeti bolyp memlekettik organdardyń nashaqorlyqqa jáne esirtki bıznesine qarsy turý jónindegi is-qımylyn úılestirý, aldyn alý sharalary keshenin júzege asyrý boıynsha tıimdi tásilder ázirleý, esirtkige táýeldi adamdardyń profılaktıkasyn, emin jáne ońaltý júıesin jetildirý jumystary aıqyndaldy.

Shtab quramyna Bas prokýratýranyń, Ulttyq qaýipsizdik komıtetiniń, Qarjy monıtorıngi agenttiginiń, Ulttyq banktiń, Qarjy naryǵyn retteý jáne damytý agenttiginiń ókilderi, sondaı-aq birqatar jaýapty mınıstrlik basshysy endi.

Premer-mınıstrdiń ókimimen sondaı-aq oblystarda, Astana, Almaty jáne Shymkent qalalarynda óńirlik shtabtar qurý kózdelgen.

Eske sala keteıik, buǵan deıin elimizde salyqtyq ákimshilendirýdiń ıntegratsııalanǵan júıesin engizý josparlanyp otyrǵanyn jazǵan edik.