Úkimet eń tómengi jalaqyny esepteý ádistemesin qaıta qaraıdy

ASTANA. KAZINFORM – Úkimet eń tómengi jalaqyny esepteý ádistemesin qaıta qaraıdy. Bul týraly Premer-mınıstrdiń orynbasary – Ulttyq ekonomıka mınıstri Serik Jumanǵarın aıtty.

- Іs júzinde eń tómengi jalaqyny esepteý ádistemesin bir jaqty qylyp alý kerek. Óıtkeni, bizde ortasha jalaqy jáne medıandy eńbekaqy bar. Keıbireýler eń tómengi jalaqy medıandy eńbekaqynyń shamamen 45-50 paıyzy bolýy tıis dep sanaıdy. Olardy turaqty bolýy úshin eń aldymen osy ádisterdiń bárin anyqtap alý qajet, - dedi ol Senattyń jalpy otyrysynan keıingi brıfıngide.

Onyń aıtýynsha, esepteýdiń jańa júıesin engizý fıskaldy shoǵyrlandyrýdy talap etedi.

- Demek, bıýdjet kirisin arttyryp, onyń ónimsiz shyǵystaryn qysqartý qajet. Muny qalaı isteıtindigimizdi búgin Premer-mınıstr de aıtty. Sondyqtan 2026 jyldyń birinshi jartyjyldyǵynda salyq jáne bıýdjet reformalary qalaı oryndalatynyn kóremiz jáne sol sol kezeńde 2027-2029 jyldarǵa arnalǵan bıýdjetpen kelemiz. Eń tómengi jalaqy máselesi sol kezeńde qarastyrylady, - dedi Serik Jumanǵarın.

Aıta keteıik, búgin Senattyń jalpy otyrysynda «2026 – 2028 jyldarǵa arnalǵan respýblıkalyq bıýdjet týraly» Zańy talqylandy. Senat qujattyń jekelegen baptaryn jańa redaktsııada usynyp, ony Májiliske qaıtardy.