Úkimet eń tómengi jalaqy mólsherin arttyrý ıdeıasynan bas tartty

ASTANA. KAZINFORM — Elimizde eń tómengi jalaqy mólsheri kóterilmeıtin boldy. Bul týraly Premer-mınıstrdiń orynbasary-Ulttyq ekonomıka mınıstri Serik Jumanǵarın málim etti. 

— Qazir eń tómengi jalaqyny kóterý jospary joq. Búginde eń tómengi jalaqy mólsheri 85 myń teńge, ázirge ony arttyrýdy qarastyryp otyrǵan joqpyz, — dedi Serik Jumanǵarın Úkimet úıinde ótken baspasóz máslıhatynda.

Óz kezeginde Qarjy mınıstri Mádı Takıev buǵan deıin esepteý júrgizilgenin aıtty.

— Biz eseptegende, barlyq kórsetkish qarasaq, ortasha, mınımaldy mólsher shamamen 90 myń teńge bolýy kerek. Biraq, jaǵdaıdy eskere otyryp, qazirgi deńgeıde qaldyrýdy jón kórdik, — dep tolyqtyrdy vedomstvo basshysy.

Aıta ketsek, Eńbek jáne halyqty áleýmettik qorǵaý mınıstri Svetlana Jaqypova eń tómengi jalaqy 2026 jylǵy qańtardan bastap kóteriletinin habarlaǵan edi.