Úkimet: «Elishilik qundylyq» baǵdarlamasyna qatyspaǵan kásiporyndar memqoldaýdan qaǵylady
ASTANA. KAZINFORM — Elishilik qundylyqty damytý degenimiz — jańa óndiristerdi qurý ǵana emes, bul — jańa tehnologııalar transferti, ǵylymdy damytý, jańa jumys oryndary men jańa quzyretterdi qalyptastyrý. Onyń mańyzyn Úkimet basshysy Oljas Bektenov túsindirdi.
— Kelesi jyly 1 qańtardan bastap tizilim naqty otandyq óndirýshini anyqtaý tetigine aınalady. Al, memlekettik jáne kvazımemlekettik sektorlar ónimdi satyp alýda osy tizilimge engen óndirýshilerge basymdyq beredi. Sonymen qatar barlyq iri kásiporyndar ózderiniń aınalasynda shaǵyn jáne orta bıznes beldeýin qura otyryp, elishilik qundylyq baǵdarlamalaryn ázirlep, qabyldaýy qajet. Eger kásiporyndar mundaı baǵdarlamalardy qabyldamaıtyn bolsa, olarǵa eshqandaı memlekettik qoldaý kórsetilmeıdi, — dedi Oljas Bektenov Úkimet otyrysynda.
Premer-mınıstrdiń baıandaýynsha, baǵdarlama otandyq kásiporyndardan tikeleı satyp alýdy qamtamasyz etýge baǵyttalǵan.
— Bul olardy lokalızatsııalaý esebinen óndiristerdi keńeıtýge jáne jańa óndiristi qurýǵa yntalandyrady. Sonymen birge el ishindegi óndiristik tizbekterdi keńeıte otyryp, otandyq kompanııalardyń arasyndaǵy kooperatsııany damytýǵa jaǵdaı jasaý kerek. Kásiporyndardyń ózara tıimdi is-qımylynyń arqasynda ǵana el ishinde tolyqqandy óndiristik tsıkl qurýǵa bolady. Nátıjesinde ımport pen óndiristik shyǵyn kólemi azaıyp, otandyq taýarlardyń básekege qabilettiligi men olarǵa degen suranys artady. Elishilik qundylyqty damytý degenimiz jańa óndiristerdi qurý ǵana emes, bul jańa tehnologııalar transferti, ǵylymdy damytý, jańa jumys oryndary men jańa quzyretterdi qalyptastyrý degendi bildiredi. Mundaı tásil elimizdiń eksporttyq áleýetine oń áserin tıgizip, ekonomıkany ártaraptandyrýdy, halyqty jumyspen qamtý men ál-aýqatynyń ósýin qamtamasyz etedi, — dep túsindirdi Úkimet basshysy.
Aıta keteıik, qazir otandyq taýar óndirýshiler tizimi jasalyp jatyr, jalǵan óndirýshiler ol tizimge enbeıdi.
Buǵan deıin Úkimet basshysy qazirgi júıe sertıfıkatty jalǵan óndirýshilerge berýge jol berip otyrǵanyn aıtyp synady.