«Qorqyt Ata» jańa arnaıy ekonomıkalyq aımaǵy quryldy
ASTANA. KAZINFORM – Elimizde «Qorqyt Ata» jańa arnaıy ekonomıkalyq aımaǵy (AEA) quryldy. Tıisti qaýlyǵa Premer-mınıstr Oljas Bektenov qol qoıdy. Bul týraly Úkimettiń baspasóz qyzmeti habarlady.
Qujatqa sáıkes, AEA Qyzylorda oblysynda «Batys Eýropa – Batys Qytaı» halyqaralyq kólik dálizine jaqyn 550 gektar aýmaqta ornalasady. Arnaıy ekonomıkalyq aımaq aýmaǵynda zamanaýı ónimdiligi joǵary, básekege qabiletti óndiristerdi jedel damytý, qyzmet kórsetýdiń sapaly jańa deńgeıin qalyptastyrý, ınvestıtsııa tartý, ekonomıka salasynda jańa tehnologııalar engizý, sondaı-aq halyqty jumyspen qamtýdy arttyrý úshin múmkindikter jasaý josparlanyp otyr.
AEA-nyń «Batys Eýropa – Batys Qytaı» halyqaralyq kólik dálizine jaqyndyǵy Qazaqstan men Ortalyq Azııa naryqtarynda ónimdi tıimdi ótkizýge múmkindik beredi. AEA aýmaǵynda salyqtyq jáne kedendik jeńildikter usyna otyryp, arnaıy quqyqtyq rejım áreket etetin bolady.
2049 jylǵa qaraı AEA-ǵa salynatyn ınvestıtsııanyń jalpy kólemin 150 mlrd teńgege, sheteldik salymdardy – 80 mlrd teńgege deıin jetkizý josparlanyp otyr. Taýarlar óndirý men qyzmet kórsetý kólemi 500 mlrd teńge deńgeıinde boljanyp otyr.
Qazaqstandyq qamtý úlesi – 90%-ǵa deıin jetedi. 25 jyl ishinde AEA kásiporyndarynda 3 366 jańa jumys ornyn ashý kózdelgen, qatysýshy kompanııalardyń sany 39-ǵa jetkiziledi.
Sondaı-aq mýltımodaldy áýe habtaryn qurý jónindegi is-sharalardy iske asyrý sheńberinde jáne keden zańnamasynyń talaptaryna sáıkes, atalǵan qaýlymen «Ońtústik», «Astana – Tehnopolıs», «Saryarqa», «Alatau» jáne «Aqtóbe» AEA-ǵa port aımaqtary mártebesi berildi.
Arnaıy ekonomıkalyq aımaqtar ınstıtýty áli kúnge deıin tıisti deńgeıde damymaı otyr. Bul týraly Úkimet otyrysynda Premer-Mınıstr Oljas Bektenov aıtqan edi.