Úkimet elektr energetıkasy salasyn damytý máselesin talqylaıdy
ASTANA. KAZINFORM – Búgin Úkimet otyrysynda elektr energetıkasy salasyn damytý men tsıfrlandyrý máselesi talqyǵa túsedi.
Al otyrys qorytyndysy boıynsha ótetin baspasóz konferentsııasynda Energetıka vıtse-mınıstri Sanjar Jarkeshov, «Samuryq-Energo» AQ basqarma tóraǵasy Qaırat Maqsutov, «KEGOC» AQ basqarma tóraǵasy Nábı Aıtjanov BAQ ókilderi tarapynan týyndaıtyn saýaldarǵa jaýap beredi.
Ótken aptadaǵy Úkimet otyrysynda aqparattyq jáne telekommýnıkatsııalyq ınfraqurylymdy damytý, jylytý maýsymyndaǵy órt qaýipsizdigi sharalary qaraldy.
Birinshi másele boıynsha baıandama jasaǵan Premer-mınıstrdiń orynbasary — Jasandy ıntellekt jáne tsıfrlyq damý mınıstri Jaslan Mádıevtiń aıtýynsha, eki jylda 4G jelisi barlyq eldi mekenderdiń 92 paıyzyna deıin jetedi.
— Qazir elimizdegi aýyldardyń 84 paıyzynda mobıldi ınternet bar. 2027 jyldyń sońyna deıin baılanys operatorlary bul kórsetkishti odan ári arttyrý úshin birqatar aýqymdy jobany júzege asyrady. Nátıjesinde, 4G jelisi barlyq eldi mekenniń 92 paıyzyna deıin jetedi. Sonymen qatar, 5G jelisi oblystyq jáne respýblıkalyq mańyzy bar 20 qalaǵa engizilip, qalalardyń 60-75% aýmaǵyn qamtıtyn bolady. Budan bólek, 40 000 shaqyrym avtojol boıy 4G mobıldi ınternetimen qamtamasyz etiledi. Bul joba jeke ınvestordy tarta otyryp júzege asyrylady, — dedi Jaslan Mádıev.
Al «Qazaqtelekom» aktsıonerlik qoǵamynyń basqarma tóraǵasy Baǵdat Mýsın Kaspıı tabany arqyly tartylatyn optıkalyq kabel qashan ázirlenip bitetinin aıtty.
— 2025 jyly Kaspıı túbimen optıkalyq kabel tóseýge baǵyttalǵan strategııalyq jobany iske asyryp bastadyq. Bas merdiger tańdaldy, ol — qytaılyq iri kompanııa. Qazaqstan men Ázerbaıjan tarapynan teńiz zertteýleri de aıaqtaldy. Kabeldiń jobalyq úlgisi ázirlenip, zaýytta synaqtar júrgizilip jatyr. Tıisti qural-jabdyqtar satyp alyndy, — dedi ol.
Talqylanǵan máseleni qorytyndylaǵan Úkimet basshysy Oljas Bektenov «Qoljetimdi Internet» ulttyq jobasy 2027 jylǵa qaraı elimizdi baılanys jelilerimen jáne eń kemi sekýndyna 100 Mbıt bolatyn jyldamdyǵy joǵary ınternetpen 100% qamtýǵa múmkindik beretindigin aıta kele, birqatar naqty tapsyrma berdi.
- Birinshi. Búginde biz telefon jáne ınternet-alaıaqtyq jaǵdaılarynyń kóbeıip jatqanyn kórip otyrmyz. Olardyń deni sheteldik nómirlerdiń jáne ulttyq júıemizde tirkelmegen qurylǵylardyń kómegimen jasalady. Sondyqtan Jasandy ıntellekt jáne Іshki ister mınıstrlikteri osyndaı zańsyz áreketterge tosqaýyl qoıý jumystaryn kúsheıtýi qajet. Derekter bazasynan azamattardyń derbes málimetteriniń taralyp ketkeni úshin jazany qatańdatý kerek. Mundaı talap memlekettik organdarmen qatar, qarjy uıymdaryna, mobıldi operatorlar men jeke bızneske de qatysty bolýǵa tıis. Balalardyń tsıfrlyq keńistikte qorǵalýyn qamtamasyz etý úshin sim kids jobasynyń tájirıbesin keńinen taratý kerek, - dedi Premer-mınıstr.
Úkimet basshysy ekinshi másele retinde baılanys nysandaryn salý kezinde basy artyq bıýrokratııadan aryla almaı kele jatqanymyzdy aıtty.
- Keıde antenna baǵanyn ornatý jumystarynyń ózi bir jylǵa deıin sozylyp ketýi múmkin. Jappaı tsıfrlandyrý jaǵdaıynda mundaı úderisterdi ońtaılandyryp, barynsha jedeldetý kerek. Jasandy ıntellekt mınıstrligine Ónerkásip jáne Qurylys mınıstrligimen, baılanys operatorlarymen birge bir aı merzimde osy másele boıynsha naqty usynystar ázirleýdi tapsyramyn, - dedi ol.
Sondaı-aq Oljas Bektenov eldi mekenderde baılanys pen ınternet sapasy tómen aımaqtardyń máselesin birjola sheshý úshin óńir ákimdikterine baılanys operatorlaryna bazalyq stantsııalar ornatýǵa oryn bólýge, sonyń ishinde kez kelgen qolaıly nysandarda ornalastyrýǵa járdemdesýdi tapsyrdy.
Otyrystyń kún tártibine shyǵarylǵan ekinshi másele boıynsha sóz sóılegen Tótenshe jaǵdaılar mınıstri Shyńǵys Árinov eldegi eskirgen gaz ballondardyń máselesi sheshimin áli tappaǵanyn aıtty.
— Byltyr eskirgen turmystyq gaz ballondaryn paıdalaný men olardy tańbalaý máselesin kótergen bolatynmyn. Qazir eki qalada (Şýchınsk jáne Stepnogorsk) gaz ballondardy tańbalaý jónindegi pılottyq joba iske qosyldy. Alaıda, eldegi gaz ballondaryn óndirý jáne tozyǵy jetkenderin joıý máselesi sheshilmegen kúıde qalyp otyr, — dedi mınıstr.
Osy oraıda Premer-mınıstr Oljas Bektenov ákimdikterge demalys jáne mereke kúnderi jer úılerge reıd júrgizip, peshterdi tekserýdi júktedi.
— Demalys jáne mereke kúnderi turǵyn úı sektorynda reıdter júrgizip, jylytý peshterin tekserý qajet. Bul iske ákimdik qyzmetteri men ishki ister mınıstrliginiń qyzmetkerlerin de tartý kerek. Reıd pen tekserý barysynda órt shyǵý qaýpi bar jáne jylytý júıesi durys jumys istemeıtin úıler anyqtalýǵa tıis. Atalǵan faktiler oryn alǵan jaǵdaıda olardy joıý boıynsha jedel sharalar qabyldaǵan jón. Sonymen qatar Tótenshe jaǵdaılar mınıstrligi tek resmı usynymdar berýmen shektelip qalmaýy kerek. Bul — eń aldymen adamdardyń qaýipsizdigine qatysty másele. Sondyqtan óte naqty ári úılesimdi jumys qajet, — dedi Oljas Bektenov.
Sonymen qatar ol Ónerkásip, Ulttyq ekonomıka jáne Ekologııa mınıstrlikterine osy jyldyń sońyna deıin Qazaqstanda ballon shyǵarý máselesin sheshýdi tapsyrdy.
Úkimet basshysynyń dereginshe, ótken jylytý maýsymynda órtten qaza tapqandardyń deni — zeınetkerler, jumyssyzdar, múgedektigi bar adamdar. Osy oraıda ol áleýmettik turǵyda osal toptardyń baspanasyn erekshe baqylaýǵa alýdy tapsyrdy.
— Óńir ákimdikterine Tótenshe jaǵdaılar mınıstrligimen jáne Eńbek mınıstrligimen birlesip, bir aı ishinde halyqtyń áleýmettik osal toptary turatyn úılerdiń tizimin naqtylaýdy tapsyramyn. Óńir ákimdikteri osy sanattaǵy adamdardyń úılerin erekshe baqylaýda ustap, olarǵa qajetti qoldaý kórsetsin, — dedi Premer-mınıstr.