Úkimet eldiń 3 jyldyq áleýmettik-ekonomıkalyq damý boljamyn pysyqtaıdy
ASTANA. KAZINFORM — Búgin saǵat 10:00–de Úkimet úıinde Úkimet otyrysy ótedi. Onda Mınıstrler kabınetiniń músheleri 2 máseleni talqyǵa salady.
Atap aıtqanda, Úkimet músheleri Qazaqstan Respýblıkasynyń 2026-2028 jyldarǵa arnalǵan áleýmettik-ekonomıkalyq damý boljamyn qarastyryp, aldaǵy jylytý maýsymyna daıyndyq máselesin pysyqtaıdy.
Otyrys qorytyndysy boıynsha ótetin baspasóz konferentsııasynda
— Ónerkásip jáne qurylys vıtse-mınıstri Qýandyq Qajkenov,
— Energetıka vıtse-mınıstri Suńǵat Esimhanov BAQ ókilderi tarapynan týyndaıtyn saýaldarǵa jaýap beredi.
Ulttyq ekonomıka mınıstrliginiń buǵan deıingi boljamyna sáıkes, munaıdyń baǵasy barreline 80 dollar bolǵan kezde jalpy ishki ónimniń naqty ósýi 2026-2028 jyldary 6 paıyzǵa deıin jedeldeıdi. Ataýly Nomınaldy JІÓ 2024 jylǵy 135 trln teńgeden 2028 jyly 218,5 trln teńgege deıin ósedi. Syrtqy saýdada eksport 2024 jylǵy 83,1 mlrd dollardan 2028 jyly 94,8 mlrd jollarǵa deıin ulǵaıyp, ımport 60,7 mlrd dollardan 65,6 mlrd dollarǵa deıin artady. Inflıatsııa bıyl 5,5-7,5 paıyz mejelesinde bolsa, 2026-2028 jyldary 5 paıyzǵa deıin baıalaıdy. Respýblıkalyq bıýdjettiń kiristeri 2026 jylǵa qaraı 18,4 trln teńge nemese 14,1 paıyzǵa ósýi kútiledi.
Memleket basshysynyń «Ádiletti Qazaqstan: zań men tártip, ekonomıkalyq ósim, qoǵamdyq optımızm» Joldaýyndaǵy tapsyrmalardy júzege asyrý aıasynda Úkimet óńirlerdiń aldaǵy jylytý maýsymyna daıyndyq jumystaryn keshendi túrde tekserip jatyr. Basty nazar energetıkalyq ınfraqurylymy ábden tozǵan jáne apat qaýpi joǵary oblystarda bolmaq.
Osy maqsatta Premer-mınıstrdiń tapsyrmasymen úkimettik jumys toptary óńirlerge attanyp ketti. Olar búginge deıin elimizdiń birqatar óńirindegi jylytý maýsymyna daıyndyq barysyn tekserdi.
Aıta keteıik, ótken aptada — 19 tamyzda ótken Úkimet otyrysynda temirjol salasyn damytý jáne tsıfrlandyrý máselesi talqylandy. Osy másele boıynsha negizgi baıandama jasaǵan Kólik mınıstri Nurlan Saýranbaevtyń aıtýynsha, temirjol jelisiniń jalpy paıdalaný uzyndyǵy — 16 myń shaqyrym. Tozý deńgeıi 57 paıyzdy quraıdy. Bul poıyzdardyń qozǵalys jyldamdyǵy men qaýipsizdigine áser etedi. Osy problemalardy sheshý úshin 2029 jylǵa deıin 5 myń shaqyrym jańa jol qurylysy men jańartý jumystary atqarylyp jatyr. Sonymen qatar, 11 myń shaqyrym joldyń jóndeý jumystary qolǵa alynǵan.
Munan bólek qazirgi kezde mynadaı 5 joba boıynsha jańa qurylys jumystary júrip jatyr:
1. «Dostyq — Moıynty»,
2. «Almaty aınalma temirjoly»,
3. «Darbaza — Maqtaaral»,
4. «Moıynty — Qyzyljar»
5. «Baqty — Aıagóz».
Al Tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıev ózi basqaratyn vedomstvo temirjol salasyn tsıfrlandyrýdyń mynadaı bes baǵytyn iske asyryp jatqanyn aıtady:
— memlekettik qyzmetterdi elektrondyq formatqa kóshirý;
— tasymaldardyń ashyqtyǵy men tıimdiligin arttyrý úshin bıznes-protsesterdi reınjınırıngteý;
— ınnovatsııalyq ekojúıe qurý jáne tsıfrlyq tehnologııalardy engizý;
— jolaýshylardy OneWeb jáne Starlink spýtnıktik ınternetimen qamtamasyz etý;
— tranzıttik tasymaldardy onlaın baqylaý júıesin engizý.
— «Jolaýshylar tasymaly» aktsıonerlik qoǵamy men «Jusan Mobile» aktsıonerlik qoǵamy birlesip, poıyzdardy OneWeb spýtnıktik ınternet tehnologııasy arqyly symsyz ınternetpen qamtamasyz etýdi synaqtan ótkizýdi aıaqtady. OneWeb spýtnıkterine beıimdelgen mýltımedııalyq qyzmetter jabdyǵy qoldanyldy. Pılottyq joba № ¾ (Astana — Almaty) jáne № 67/68 (Astana — Óskemen) Talgo poıyzdarynda júzege asyryldy. Derekterdi berý jyldamdyǵy — 100 Mbıt/s. Sonymen qatar, Astana — Býrabaı baǵyty boıynsha júretin poıyzda Starlink qoldanylǵan pılottyq joba iske qosyldy. Pılottyq joba aıaqtalǵannan keıin, Mınıstrlik ony masshtabtaý máselesin qarastyrady, — dedi vedomstvo basshysy.
Ónerkásip jáne qurylys mınıstri Ersaıyn Naǵaspaev bolsa qyzmet etý merzimi uzartylǵan vagondardy paıdalanýǵa shekteý engizý qajettigin alǵa tartty.
— Osy shara otandyq temirjol kólik óndirýshilerin qosymsha tapsyrystarmen qamtamasyz etýge múmkindik beredi. Búginde otandyq óndirýshilerden QTJ úshin júk vagondaryn satyp alýǵa protsenttik mólsherlemeni sýbsıdııalaýǵa bólingen qarajat kólemi tómen. Osyǵan baılanysty, atalǵan jumystardy júzege asyrý úshin jetkilikti qarjylandyrýdy qamtamasyz etý máselesin pysyqtaý qajet, — dedi mınıstr.
Sonymen qatar ol óndiristerdi tapsyryspen qamtamasyz etý maqsatynda uzaq merzimdi perspektıvada offteık-kelisimsharttar jasaý máselesin pysyqtaýdy usyndy.
Talqylaǵan máseleni túıindegen Úkimet basshysy Oljas Bektenov temirjol salasyn tsıfrlandyrý kezinde IT-ınfraqurylymdy basqarýdyń jáne aqparattyq júıelerdiń ıntegratsııasyn júrgizýdiń tutas tásilin júzege asyrý qajettigin basa aıtty.
Sondaı-aq jolaýshylar tasymaly salasyna erekshe nazar aýdartty.
— Qyzmet kórsetý sapasy men vagondardyń jaǵdaıyna qatysty halyqtyń tarapynan aryz-shaǵymdar azaıǵan joq. Bul temirjol salasymen qatar, elimizdiń ımıdjine áser etedi. Sondyqtan barlyq tasymaldaýshylar jolaýshylar vagondary men lokomotıv parkin júıeli túrde jańaryp otyrýyn qamtamasyz etýi qajet, — dedi ol.
Otyrys sońynda Premer-mınıstr birqatar naqty tapsyrma berdi.
Atap aıtqanda, bıznes memleketaralyq ótkizý beketterinde júkterdiń turyp qalý problemasymen kezigip otyr. Osyǵan oraı Kólik, Qarjy mınıstrlikteri Ulttyq qaýipsizdik komıtetiniń Shekara qyzmetimen birlesip, shekarada jedel ári sapaly memlekettik qyzmet kórsetý jóninde sharalar qabyldaýy qajet.
2028 jyly jolaýshylar vagondarynyń parki 3 myńnan asady. Bul tozyǵy jetken vagondarǵa qatysty máseleni sheshýge múmkindik beredi. Alaıda jeke tasymaldaýshylar óz vagondaryn jańartýda qıyndyqtarǵa tap bolyp otyr. Osy maqsatta Kólik mınıstrligi jeke tasymaldaýshylardy qoldaý sharalaryn ázirleýi tıis. Bul jalpy jolaýshylar jáne júk tasymalynyń sapasyna oń áser etedi.
Munan bólek, Ónerkásip jáne Kólik mınıstrlikteri kásiporyndardy uzaqmerzimdi kelisimsharttarmen qamtamasyz ete otyryp, mashına jasaý óndirisin lokalızatsııalaýdy kezeń-kezeńmen arttyrýǵa baǵyttalǵan úlgilik kelisimderdi ázirleýi tıis.