Úkimet eldegi kitaphanalar qoryn tolyqtyrý úshin komıssııa qurýy múmkin

QYZYLORDA. KAZINFORM — 2026 jyly ótkiziletin elimizge belgili tulǵalardyń mereıtoılar kúntizbesi bar. Olardyń ómir joly men shyǵarmashylyǵyn nasıhattaý óskeleń urpaqtyń rýhanı kemeldenýine septigin tıgizetini anyq. 

Bul týraly búgin Qyzylorda qalasynda Ulttyq quryltaı aıasynda ótken Áleýmettik-damý sektsııasynda Premer-mınıstrdiń orynbasary — Mádenıet jáne aqparat mınıstri Aıda Balaeva aıtty.

Sondaı-aq, mınıstr Ulttyq balalar kitaphanasy máselesi týraly oıyn bildirdi.

— Elimizdegi kitaphanalarda oqıtyn kitap az deýge bolady. Óıtkeni osy otyz jylda bir avtordyń kitaby júz, eki júz, tipti myń ret shyqqan derekter bar. Ataýyn ózgertip qaıta-qaıta shyǵara beredi. Biz ár kitaphananyń kitap qoryn zerdelep shyqtyq. Shynymen, mundaı ókinishti jaǵdaılar kóp kezdesti. Balalar ózi oqyǵysy kelip, izdegen kitabyn taba almaıdy. Balalardyń kitapqa qyzyǵýshylyǵyn arttyrǵymyz keledi, biraq olardyń suranysyn qanaǵattandyratyn dúnıeler joqtyń qasy. Ol úshin tolyq deńgeıde jaǵdaı jasaı almaı kele jatqanymyzdy ashyq aıtýymyz kerek, — dedi Aıda Balaeva.

Sondyqtan mınıstr Úkimet deńgeıinde komıssııa quryp, kitaphanalar qoryn tolyqtyrý múmkindigin qarastyrýdy usyndy. Sonymen qatar bul jumysty jedeldetý qajettigin aıtty. 

Eske salsaq, búgin Qyzylorda qalasynda V Ulttyq quryltaı bastaldy.