Úkimet ekonomıkanyń ósimine salynǵan ınvestıtsııa kólemin 9,6 trln teńgege baǵalaıdy

ASTANA. KAZINFORM - Premer-Mınıstrdiń orynbasary – ulttyq ekonomıka mınıstri Nurlan Baıbazarov ekonomıkadaǵy ósimdi qamtamasyz etý úshin 9,6 trln teńge ınvestıtsııalaý josparlanyp otyrǵanyn aıtty. Bul týraly Úkimettiń baspasóz qyzmeti habarlady.

Bul somaǵa bıýdjette qarastyrylǵan bıýdjettik ınvestıtsııalar jáne bıýdjetten tys ınvestıtsııa kózderi kiredi.

«Negizgi bóligin 7 trln teńge kólemindegi bıýdjetten tys ınvestıtsııa kózderi alady. Birinshiden, bul bizdiń ulttyq holdıngterimizdiń qarajaty. «Samuryq-Qazyna» men «Báıterektiń» barlyq erkin ótimdiligi osy ósý baǵdarlamasyna baǵyttalǵan. Ekinshi kózi — ishki jáne syrtqy kapıtal naryǵy. Biz qazir ishki resýrstardy belsendi túrde tartyp jatyrmyz. Bul ekinshi deńgeıdegi bankter men basqa da ınstıtýtsıonaldyq ishki ınvestorlardyń qarajaty», - dep atap ótti Nurlan Baıbazarov.

Halyqaralyq qarjy uıymdarymen de mańyzdy jumys júrgizilip jatyr. Jobalarǵa uzaq jeńildikti qarjylandyrý kózderi tartylyp jatyr. Sondaı-aq otandyq jáne sheteldik ınvestorlardyń jeke ınvestıtsııalary mańyzdy ról atqarady.