Úkimet ekonomıkalyq ósim men halyq tabysyn arttyrýdy kózdeıdi
ASTANA.KAZINFORM — Úkimet úıinde Qazaqstan Respýblıkasynyń Premer-mınıstri Oljas Bektenovtiń tóraǵalyǵymen QR Úkimetiniń Halyqaralyq qarjy uıymdarymen yntymaqtastyǵy jónindegi úılestirý keńesiniń otyrysy ótti. Bul týraly Úkimettiń baspasóz qyzmeti habarlady.
Jıynǵa Dúnıejúzilik bank, Halyqaralyq valıýta qory, Eýropalyq qaıta qurý jáne damý banki, Azııa damý banki, Islam damý banki, Eýrazııalyq damý banki, Shyǵys kórshiler men Ortalyq Azııa elderine nesıe berý jónindegi ınvestıtsııalyq banki jáne basqa da uıym ókilderi qatysty.
Elimizdiń ınfraqurylymyn salý jáne jańǵyrtý jónindegi jobalardy júzege asyrý barysy qaraldy. Sondaı-aq makroekonomıkalyq turaqtylyqty nyǵaıtý, adamı kapıtaldy damytý, ónimdi ınnovatsııalar men JI tehnologııalaryn engizý jónindegi bastamalarǵa nazar aýdaryldy.
Jańa Konstıtýtsııanyń qabyldanýymen elimizde ekonomıkanyń serpindi ósýine jáne azamattardyń ómir sapasyn jaqsartýǵa baǵyttalǵan damýdyń jańa kezeńi bastalǵany atap ótildi. Óz kezeginde, quqyqtyq bazany jetildirý elimizdiń ınvestıtsııalyq tartymdylyǵyn arttyryp, jobalardy júzege asyrýǵa qajetti kepildikterdi qamtamasyz etedi.
Ekonomıkalyq saıasat máselesi boıynsha Úkimettiń, Ulttyq bank jáne Qarjy naryǵyn retteý jáne damytý agenttiginiń makroekonomıkalyq turaqtandyrý jáne halyqtyń ál-aýqatyn jaqsartý jónindegi 2026-2028 jyldarǵa arnalǵan birlesken is-qımyl baǵdarlamasyn júzege asyrýdyń mańyzdylyǵy atap ótildi. 2025 jyldyń qazan aıynan beri jyldyq ınflıatsııanyń baıaýlaýy baıqaldy, bul — júzege asyrylyp jatqan keshendi sharalardyń nátıjesi.
— Biz baǵa qysymyn, ınflıatsııa deńgeıin tómendetý jónindegi saıasatty tabandy túrde jalǵastyrýǵa nıettimiz. Úkimettiń, Ulttyq Bank jáne Qarjy naryǵyn retteý jáne damytý agenttiginiń makroekonomıkalyq turaqtylyqty qamtamasyz etý jáne halyqtyń ál-aýqatyn jaqsartý jónindegi birlesken baǵdarlamasy júzege asyrylyp jatyr. Bıyl biz azamattardyń naqty tabysyn kem degende 2-3%-ǵa arttyrýdy aldymyzǵa maqsat etip qoıdyq. Bul — júzege asyrylyp otyrǵan aýqymdy jumys, — dep atap ótti Oljas Bektenov.
Dúnıejúzilik banktiń fıskaldyq saıasat jáne ekonomıkalyq ósý baǵytynyń óńirlik basshysy Antonıo Nýchıfora men Halyqaralyq valıýta qorynyń Qazaqstandaǵy mıssııasynyń basshysy Amına Laresh makroekonomıkalyq turaqtylyqty jalǵastyrý boıynsha usynystaryn jetkizdi. Ekonomıkalyq ónimdilikti arttyrýdy jalǵastyrýǵa jáne jeke sektordyń turaqty ekonomıkalyq ósýdiń draıveri retindegi rólin kezeń-kezeńimen nyǵaıtýǵa basymdyq berildi.
Bul baǵytta júrgizilip jatqan jumystar týraly memlekettik organdar men uıymdardyń ókilderi pikir bildirdi.
Prezıdent keńesshisi, Strategııalyq josparlaý jáne reformalar agenttiginiń tóraǵasy Áset Erǵalıev memlekettiń úlesin tómendetý jáne naqty ekonomıkany nesıeleýdegi bank sektorynyń rólin kúsheıtý jónindegi jumystyń mańyzdylyǵyn atap ótti. Bul memlekettik kapıtal men jeke kapıtal arasyndaǵy básekelestikti boldyrmaýǵa múmkindik beredi. Azyq-túlik ınflıatsııasynyń deńgeıin tómendetý máselesine qatysty saýda naryqtarynyń tıimdiligin odan ári arttyrýǵa, kóterme-taratý ortalyqtarynyń ınfraqurylymy men logıstıkany damytýǵa, óndiris kólemin ulǵaıtýǵa jáne basqa da baǵyttarǵa nazar aýdaryldy.
Ulttyq bank tóraǵasynyń orynbasary Álııa Moldabekova ınflıatsııany tómendetý maqsatynda fıskaldyq saıasatty aqsha-nesıe saıasatymen úılestirý júzege asyp jatqanyn habarlady. Qazirgi ýaqytta ınflıatsııany turaqtandyrý úshin aqsha-nesıe boıynsha jaǵdaı týǵyzýǵa jáne ınflıatsııalyq boljamdardy nyǵaıtýǵa baǵyttalǵan dáıekti aqsha-nesıe saıasaty júrgizilýde. Nesıeleýdiń shekten tys ósýin, ásirese tutynýshylyq nesıe segmentinde shekteýge múmkindik beretin makro jáne mıkroprýdentsıaldyq quraldar belsendi qoldanylýda. Máselen, QR Ulttyq bankiniń derekteri boıynsha, eger 2024 jyly halyqqa berilgen nesıeniń barlyq túriniń ósimi 21,9%-dy qurasa, 2025 jyly bul kórsetkishtiń ósýi 8,7%-ǵa deıin baıaýlady. Osylaısha, Úkimet, UB jáne QNRDA qabyldaǵan sharalar olardyń tıimdiligin kórsetip otyr jáne ınflıatsııalyq protsesterge tejegish retinde áser etýde.
Ulttyq ekonomıka vıtse-mınıstri Asan Darbaev Inflıatsııany baqylaý jáne tómendetý jónindegi sharalar keshenin júzege asyrý sheńberinde azyq-túlik ınflıatsııasy deńgeıin tómendetý boıynsha qabyldanyp jatqan sharalar týraly baıandady. Máselen, negizgi baǵyttardyń biri — naryqty qajetti ónimmen toltyrý, ımportty almastyrýǵa basa nazar aýdara otyryp, ónim óndirý kólemin ulǵaıtý, azyq-túlik taýarlaryn bólshek saýdada ótkizýdiń ashyqtyǵyn jáne baǵa qoljetimdiligin qamtamasyz etý, ÁMAT óndirýshilerin qoldaý jáne onyń nomenklatýrasyn ýaqytsha keńeıtý, ustamdy tarıftik saıasatty júzege asyrý, onyń ishinde syrtqy saýda jáne aqsha-nesıe saıasaty baǵyty bar. Nátıjesinde birinshi toqsanda ınflıatsııanyń birtindep tómendeýi boıynsha oń dınamıka baıqalady. Inflıatsııany tómendetý boıynsha oń dınamıkany saqtaý jáne jalǵastyrý úshin qosymsha qadamdyq algorıtm ázirlendi.
Aıta ketelik Qazaqstanda ınflıatsııa alty aı qatarynan baıaýlap keledi.