Úkimet ekologııalyq aǵartý isiniń biryńǵaı úlgisin engizýge tıis — Prezıdent

ASTANA. KAZINFORM — Úkimet ekologııalyq aǵartý isiniń biryńǵaı úlgisin engizýge tıis. Bul týraly Memleket basshysy Qasym-Jomart Toqaev Qazaqstan halqyna Joldaýynda aıtty. 

— Qorshaǵan ortaǵa janashyr bolý, oǵan úlken jaýapkershilikpen jáne shynaıy qamqorlyqpen qaraý ulttyq ıdeologııanyń ózegi bolýy kerek. Byltyrdan beri «Taza Qazaqstan» jalpyulttyq jobasy júzege asyrylyp jatyr, bul barshańyzǵa aıan. Osy jumysqa mıllıondaǵan azamatymyz atsalysyp jatyr. Jurt bolyp jumylýdyń arqasynda 860 myń gektardan astam aýmaq tazalandy, tórt mıllıonnan astam aǵash otyrǵyzyldy. Osyndaı belsendi jumysty jalǵastyra bersek, ańsaǵan armanymyzǵa jetip, Qazaqstan naǵyz jasyl el bolmaq. Al bul keleshek urpaqqa keremet úlgi-ónege jáne ósıet bolyp qalary anyq, — dedi Qasym-Jomart Toqaev.

Prezıdent muny el ishinde jappaı qoldaý tapqan jasampaz qundylyqtardyń jarqyn kórinisi, halqymyzdyń ıgi isterge degen umtylysy dep túsiný kerektigin atap ótti.

— Osy jumysqa atsalysyp júrgen azamattarǵa, ásirese, jastarǵa rızashylyǵymdy bildiremin. Tazalyq mádenıetin qoǵamda tereń ornyqtyrý — óte mańyzdy mindet. Osy baǵytta Úkimet ekologııalyq aǵartý isiniń biryńǵaı úlgisin engizýge tıis. Bul jumys mektepten bastap joǵary oqý oryndaryna deıin barlyq deńgeıdegi bilim mekemelerin qamtýy qajet, — dedi Memleket basshysy.

Sondaı-aq Memleket basshysy joǵary tehnologııaǵa 1 mlrd dollar ınvestıtsııa tartý týraly baǵdarlama ázirleý qajettigin aıtty.

Aıta keteıik, Joldaýdyń onlaın translıatsııasy Jibek Joly efırinde, sondaı-aq telearnanyń YouTube arnasynda júrip jatyr.

Kazinform saıty tikeleı efırmen qatar, jazbasha translıatsııa da jasaıdy.

Sondaı-aq Joldaý mátinin agenttiktiń telegram arnasynan oqýǵa bolady.