Úkimet derekter ortalyqtary alqaby jobasynyń iske asýyn jedeldetýdi tapsyrdy
ASTANA. KAZINFORM — Premer-mınıstr Memleket basshysynyń Ulttyq quryltaıdyń V otyrysynda alǵa qoıǵan mindetteri aıasynda «Derekterdi óńdeý ortalyqtarynyń alqaby» jobasynyń qazirgi jaǵdaıy jóninde keńes ótkizdi, dep habarlaıdy Úkimettiń baspasóz qyzmeti.
Jıynda Premer-mınıstrdiń orynbasary — jasandy ıntellekt jáne tsıfrlyq damý mınıstri Jaslan Mádıev, energetıka mınıstri Erlan Aqkenjenov, Pavlodar oblysynyń ákimi Asaıyn Baıhanov, «Qazaqtelekom» AQ basqarma tóraǵasy Baǵdat Mýsın júrgizilip jatqan jumystar týraly baıandady.
Pavlodar oblysynyń Ekibastuz qalasynda «Derekterdi óńdeý ortalyqtary alqaby» jobasyn júzege asyrý sheńberinde jer ýchaskeleri aıqyndalyp, negizgi kelisimder jasaldy, sondaı-aq qýaty 215 MVt bolatyn qosalqy stansa satyp alyndy. Atalǵan sharalar jobanyń energetıkalyq ınfraqurylymynyń negizin qalyptastyrady.
Keńes barysynda ınvestorlar úshin odan ári qajetti jaǵdaı qalyptastyrý aıasynda energııamen jabdyqtaýdyń jeńildetilgen tarıftik modeli bekitilip, tıisti ınvestıtsııalyq jáne salyqtyq preferentsııalar belgilendi.
Baǵdat Mýsın halyqaralyq tehnologııalyq jáne ınvestıtsııalyq kompanııalardy tartý baǵytynda jumystar júrgizilip jatqanyn baıandady. AQSh, Qytaı jáne Úndistan elderinen «bultty» esepteý, úlken derekterdi óńdeý jáne JI salalarynda jumys isteıtin 20-dan astam hyperscale-kompanııalarmen kelissózder júrgzildi.
Kelissózder qorytyndysy boıynsha 100 MVt-tan joǵary qýatqa aldyn ala suranys qalyptastyryldy. Sonymen qatar «Derekterdi óńdeý ortalyqtary alqaby» jobasynyń jalpy áleýeti 1 GVt-qa deıin jetedi jáne iri «zákirlik» klıentterdi ornalastyrýǵa eseptelgen.
Jalpy alǵanda, «DÓO alqaby» jobasyn júzege asyrý Qazaqstanda iri óńirlik tsıfrlyq habty qalyptastyrýǵa jáne álemdik jetekshi tehnologııalyq kompanııalardy tartýǵa baǵyttalǵan.
Premer-mınıstr qajetti normatıvtik sheshimderdi qabyldaýdy jedeldetýdi jáne jobanyń barlyq kezeńderiniń belgilengen merzimde oryndalýyn qamtamasyz etýdi tapsyrdy.
Budan buryn Memlekettik kirister komıtetiniń Derekterdi óńdeý ortalyǵy qurylatynyn jazdyq.
