Úkimet depýtattardyń agrobank qurý týraly usynysyn taǵy qoldamady

ASTANA. KAZINFORM — Premer-mınıstr Oljas Bektenov Májilis depýtattarynyń saýalyna bergen jaýapta agrobank qurý ıdeıasyn Úkimet áli de quptamaıtynyn jetkizdi. 

— Qazirgi ýaqytta agroónerkásip kesheni sýbektilerine jeńildikti qarjylandyrýdy usyný fýnktsııalaryn birqatar mamandandyrylǵan uıym («Agrarlyq nesıe korporatsııasy» AQ, «QazAgroFınans» AQ, «Damý» qory) jáne kredıttik seriktestikter júzege asyrady. Atalǵan ınstıtýttardyń agrarlyq sektordy kredıtteý úshin qajetti ınfraqurylymy, tájirıbesi jáne normatıvtik bazasy bar. Olardyń áleýetin kúsheıtý jáne qoldanystaǵy baǵdarlamalardy jetildirý jańa qurylym qurmaı-aq, aýyl sharýashylyǵy taýarlaryn óndirýshilerdiń qarjy resýrstaryna qoljetimdiligin keńeıte alady, — dep jazylǵan jaýapta.

Onyń sózinshe, osy maqsat úshin jańa bank qurý úlken kapıtaldy qajet etedi.

— Agrobank qurý úshin kapıtaldandyrýǵa, qyzmetti uıymdastyrýǵa jáne fılıaldyq jelini qalyptastyrýǵa edáýir memlekettik shyǵyn talap etiledi. Osyǵan baılanysty bıýdjet qarajatyn tıimdi paıdalaný jáne kvazımemlekettik sektordy ońtaılandyrý qajettiligin eskere otyryp, resýrstardy qoldanystaǵy qoldaý quraldaryn jetildirýge baǵyttaǵan jón dep sanaımyz, — dep jazady Premer-mınıstr.

Aıta ketý kerek, Májilistegi «Aýyl» partııasynyń fraktsııasy elde agrobank qurý týraly bastama kóterip kele jatqanynan birneshe jyldyń júzi boldy.