Úkimet densaýlyq saqtaý ınfraqurylymyn damytý tujyrymdamasyn qabyldady
ASTANA. KAZINFORM – Búgin Úkimet otyrysynda QR densaýlyq saqtaý ınfraqurylymyn damytýdyń 2030 jylǵa deıingi tujyrymdamasy qabyldandy.
«Prezıdenttiń qoldaýy arqasynda, sońǵy 5 jylda 400-den astam densaýlyq saqtaý nysany salyndy. 261 mlrd teńgeden astam somaǵa medıtsınalyq jabdyq satyp alyndy. Qazirdiń ózinde «Aýyldyq densaýlyq saqtaýdy jańǵyrtý» ulttyq jobasy aıasynda aýyldyq eldi mekenderde jańa obektiler salý jumystary júrgizilýde. Jyl sońyna deıin 556 nysan salynady. Degenmen áli de kóp nárse istelý kerek. Aýrýhanalardyń, emhanalardyń, ýnıversıtetterdiń materıaldyq-tehnıkalyq bazasyn jaqsartatyn bolamyz», - dep atap ótti Premer-Mınıstr Oljas Bektenov.
Onyń atap ótýinshe, bul patsıentter men personal úshin qajetti jaǵdaı jasaýǵa jáne emdeýdiń jańa tehnologııalary men ádistemelerin damytýǵa múmkindik beredi.
«Osyǵan oraı búkil densaýlyq saqtaý salasynyń ınfraqurylymyn jańartýdy, jańa tehnıkamen jaraqtandyrýdy ári medıtsına kadrlaryn daıarlaýdy kózdeıtin uzaq merzimdi tujyrymdama qajet. Búgin mınıstrlik usynǵan tujyrymdama jobasynda densaýlyq saqtaý ınfraqurylymyn odan ári damytýdyń tutastaı kózqarasy qalyptastyrylǵan. Sondaı-aq, aýyldarǵa ǵana qatysy bar ulttyq jobadan basqa, jańa, negizgi densaýlyq saqtaý obektilerin salýdyń tizbesi aıqyndalǵan. Bul Balalar onkologııasy men gematologııasy ulttyq ortalyǵy, balalar kardıohırýrgııasy ortalyǵy, óńirlerdegi ýnıversıtettik kóp beıindi aýrýhanalar», - dedi ol.
Úkimet basshysy atalǵan nysandardyń taıaý arada salynatyndyǵyn aıtty.
«Atalǵan nysandardy salý kezinde qurylys materıaldaryn, jıhazdar men jabdyqtardy shyǵaratyn otandyq óndirýshilerdi barynsha tartý qajet. Bul óńirlerdiń ekonomıkasyna da oń áserin etetindigi sózsiz», - dedi Oljas Bektenov.
Osydan keıin Úkimet músheleri tıisti qaýlyǵa daýys berip, tujyrymdama jobasy qoldaý tapty.
